Jimin hla thar ‘Who’ chu Billboard Global 200 chart No.1-ah a debut a, soloist anga BTS member zinga he chart-a No.1 kai thei pahnihna a ni a, BTS member dang Jung Kook chu he chart-ah hian No.1 a lo kai tawh bawk a, tihian chart record siamin BTS chu group pakhat atanga an member pakhat aia tam he chart-a No.1 kai thei nei thei hmasa ber an ni ta a ni. Hetihrual hian K-pop group Stray Kids hla thar ‘Chk Chk Boom’ pawh chart top 10-ah a lang ve bawk.
Billboard Global 200 chart hi kar khat chhunga khawvel huapa hla lar dan tehna niin, chart ranking siam nan hian ram hrang hrang 200 chuanga official-only streams (subscription leh ad-supported audio leh video music services) leh download sales te chu tehna pawimawh a ni.
Jimin ‘Who’ hi July ni 19-a a tlangzarh kha niin, kar khat (Zirtawpni – Ningani, July ni 19-25)) chhungin khawvel huapin stream maktaduai 90.5 a nei thei a, sales-ah pawh 1,29,000 a tling thei a, hei hi chart No.1-ah a debut pui ta a ni.
BTS hian group angin he chart-a No.1 kai thei hi hla pasarih an nei tawh a, BTS member dang Jung Kook solo project ‘Standing Next to You’ (November 2023), Jung Kook & Jack Harlow ‘3D’ (October 2023) leh Jung Kook feat Latto ‘Seven’ (JUly 2023) te chu he chart-ah hian a No.1 tawh bawk a, tihian BTS chu group member Billboard Global 200 chart-a No.1 kai thei pakhat aia tam nei thei hmasa ber an ni ta a ni.
Sabrina Carpenter hla hit ‘Espresso’ pawh he chart-a a zawn ni lova kar thum a No.1 hnuah No.2-ah a tawlh a, Billie Eilish ‘Birds of a Feather’ chu No.3-ah bawk awm lehin, Shaboozey ‘A Bar Song (Tipsy)’ chu No.5 atangin No.4 a kai thar leh a, chart No.1 hlui Kendrick Lamar ‘Not Like Us’ chu No.5 a ni ve thung.
K-pop group Stray Kids hla thar ‘Chk Chk Boom’ chu stream maktaduai 59.2 leh sales 27,000 tlingin No.10-ah a debut a, an hla he chart top 10-a lang thei pahnihna niin, an hla dang ‘LALALALA’ chu nikum November khan No.10-ah bawk a lo debut tawh a ni. Tuna an hla thar ‘Chk Chk Boom’ hi an album thar ‘ATE’ atanga an single a ni a, he album hi Billboard 200 (albums) chart No.1-ah a debut ve thung.
Billboard Global 200 Top 10:
1 Who – Jimin
2 Espresso – Sabrina Carpenter
3 Birds Of A Feather – Billie Eilish
4 A Bar Song (Tipsy) – Shaboozey
5 Not Like Us – Kendrick Lamar
6 Please Please Please – Sabrina Carpenter
7 Beautiful Things – Benson Boone
8 I Had Some Help – Post Malone Featuring Morgan Wallen
9 Gata Only – FloyyMenor X Cris Mj
10 Chk Chk Boom – Stray Kids
Jimin ‘Who’ lar ber; BTS-in record siam
