J&K-a IED puakah sipai pahnih thi
Laleali, Akhnoor sector, Jammu & Kashmir-ah improvised explosive device (IED) ni ngeia rin puak vangin Thawhlehni khan sipai pahnih an thi niin Indian Army-in a sawi.
“IED ni ngeia hriat puakah sipai pahnih an thi a. Sipaite hian heng lai hmun hi luah vekin a titute zawn hna an thawk nghal a. Ram tana nun hlantute kan chhuangin zahna kan hlan,” tiin White Knight Corps-in X-ah an tar lang.
Thuneitute chuan sipaite hi patrolling duty an ni a, tlai dar 3:50 velah Bhattal huam chhunga ramri hnaiha duty-na bul lawkah thil na tak a puak ta niin an sawi.
Hliam tuarte chu rang takin damdawi in panpui nghal ni mah se an zinga pahnih an thi a, pakhat hi captain a ni nghe nghe a. Mi dang hliam tuarte erawh dinhmun hlauhawm an awm lo niin an sawi.
Thawhlehni vek khan Akhnoor sector-ah tho hian mortar shell chhar niin bomb sut thiamten an sut nghal niin police thuneituten PTI hnenah an sawi a. Mortar shell hi tual chhung miten Namandar khaw bula Partap Canal-ah chawhma dar 10:00 vela an hmuh niin an sawi.
Police-in a hriat veleh pan nghalin bomb disposal squad koh zui an ni a, pawi khawih lovin an sut thei a ni.
J&K-a IED puakah sipai pahnih thi
