J&K-ah Pakistani firfiakte chet tumna hre thar

J&K-ah Pakistani firfiakte chet tumna hre thar
Pahalgam-a mi firfiakte an chet avanga India-in Operation Sindoor a kalpui hnu thla ruk a liamah Pakistan-a firfiakte chuan Jammu & Kashmir beih an tum leh mek nia hriat a ni.
Indian hnuchhuiten an hriat rukah Pakistan-a firfiak pawl, a bikin Lashkar-e-Taiba (LeT) leh Jaish-e-Mohammed (JeM) chuan tha thara chet leh an tum a ni.
Hnuchhuitute chuan firfiakte hi September atang khan ramri kânin a rukin India an lut a, ram thlithlaiin ramri kâna chet dan tur pawh an ruahman niin an hria a. LeT leh JeM unit-te hian Pakistan-a Special Services Group (SSG) leh Inter-Services Intelligence (ISI) mite puihna nen Line of Control (LoC) kânin Jammu & Kashmir an lut niin an sawi.
Mi firfiak, Shamsher-a kaihhruai LeT unit-in drone hmanga ram thlirin LoC-a pawp awm laite ngaihven a, chawlhkar lo awm leh tur vel atangin fidayeen-style-in emaw, ralthuam thlakin emaw an chet tan an ring.
Indian hnuchhuitute chuan SSG sipai leh mi firfiak ni thinte awmna, Pakistan-a Border Action Team (BAT) chu Pakistan-Occupied Kashmir (PoK)-ah dah thar lehin ramri kân theih dan tur an ngaihven niin an sawi bawk.
October khan PoK-ah hian mi pawimawh rual an thukhawm a, hetah hian Jamaat-e-Islami, Hizbul Mujahideen leh ISI thuneitute pawh an tel nia hriat a ni a. An inbiakna hriat rukah chuan commander hluite hnenah pawh thla tin stipend an pek tur pek an ni a, Operation Sindoor-a an hlohte lak let leh tumin hma an la tih hriat a ni.
Pakistan chhunga inruahmanna kalpui bakah hian LeT chuan Kashmir phaizawlah an tana rinawm tur siam kawngah pawh hma an la nasa nia hriat a ni a. Pahalgam beihna thlen hnuah khan India hian heng lai firfiak pawl lo thawhpui thinte an vai nasa hle a, a reh pawh an reh duk a ni.
Hetih rual hian India hian firfiakten sum siam nana an hman nasat, ruihhlo leh ralthuam tawlh beih letna kawngah pawh hma a la nasa a, a bikin Punjab leh Rajasthan hmun hrang hrangah an che nasa.
Jammu & Kashmir-ah tual chhung inthlan a hnai a, an eibar innghahna ber, khualzinah pawh ngai an awh leh tan mek karah mi firfiakten chet leh an tum tih thawm hi a awm thar a ni.
New Delhi-a thuneitute chuan hnuchhui miten beihna thleng thei an sawi hi ‘warning pawimawh tak’ niin an ngai a, Indian Army leh hnuchhuitu pawl hrang hrangte chu ram chhung hmar lam huam chinah inrintir an ni.
India hian khawthlang lama ramri hrul, Gujarat leh Rajasthan-ah sipai chi thum tan Trishul Tri-service exercise buatsaih a tum mek laiin firfiak chet tumna a awm tih hi a awm a. Thlasik a hnai mek zel a, hetih hun lai hi ramri kân ru an tlem lai a ni thin a, thlasik hun rei tak awm tur thlen hmaa chet an tum em ni ang tih ngaihdan pawh a awm mek a ni.