Jammu & Kashmir election thawh thumna leh a tawp ber ni bawk chu thawhlehni khan zawh niin, a pumpuiah vote 65.58% a tla niin, a buatsaihtute chuan an sawi.
Election Commission of India (ECI) chuan rinphak bakin vote hi a tla tha nia sawiin, Udhampur-ah vote tla percentage sang berin, 72.91 a tla a, Samba 72.41 in a dawt bawk.
ECI chuan boruak muanawm tak hnuaiah, harsatna engmah tawk lova vote thlak hna thawh a nih thu an sawi a, a buaipuitute leh mipui chungah lawmthu an sawi.
Tarlan tawh thin angin J&K ah hian thawh thumin vote thlak a ni a, a thawh thumnaah hian district pasarihah vote thlak hna an kalpui a ni.
Chief Election Commissioner (CEC) Rajiv Kumar chuan, J&K hian democracy lungphum dik tak an keng niin ka hria, tluang leh tha taka vote thlak kalpui a ni hi ka lawm hle, a ti a. Mipuite chu hei hi chhawm nung zel tura chahin, boruak ralmuang ni zawm zel turin a duhsak bawk.
J&K inthlan vote thlak zawh tak chu chhinchhiah tlak tak, sawi fo tling tur a ni tiin, ralmuang taka awm chhunzawm zel tur leh zalenna hmang thiam a, hun lo la awm zel turah pawh zalenna lungphum nghet taka vuan zel turin Rajiv chuan a chah nghal a ni.
J&K vote tlate hi state dang inthlan result puan rualin October ni 8 ah hian puan a ni ang.
J&K assembly election-ah vote 65% tlain, a tla tha hle
