US President Joe Biden chuan Chinese President Xi Jinping-an India rama G20 summit a tel a tum loh chu pawi a tih thu a sawi.
Chinese Premier Li Qing chuan tunkara New Delhi a summit neih turah Beijing ai a awh thung dawn a ni.
“A pawi ka ti a. Mahse, kei chu ka kal dawn,” tiin Biden chuan a sawi thung a. Xi nena inhmuh tum tho niin nikum khan Indonesia-ah erawh an inhmu thung.
Xi hian a hma hian Indian capital a meeting neih turah a kal tur thu a sawi a. mahse, China foreign ministry chuan kar kalta Ningani khan zawhna an chhanah Xi kal ngei tur thu an sawi chiang thei lo a ni.
A hnu lama news report-ah China-a annual meeting inpuahchahna pawimawh avangin kumin G20 summit-ah chuan Xi a kal dawn lo tia sawi a ni ta thung a ni.
China leh India inlaichinna tun hnaiah a tlahniam hle a. Ram pahnih te hian ramri buaina nasa tak neiin an inngur chamchi a ni.
Kar kalta lawk khan Beijing-in map a tihchhuahah India ram Arunachal Pradesh leh Aksai Chin plateau te chu China ram angin a rin lut a, hei hian New Delhi a tithinur hle bawk.
Xi leh Biden te hian November thlaah inhmuhtheihna erawh neiin San Francisco-ah Asia Pacific Economic Cooperation meeting a awm dawn a ni.
Hetih lai vek hian US-China inlaichinna chuan chhiat lam a pan mek zel bawk a. Nikum November thlaa Bali a Biden leh Xi inhmuh hnu lawkah Chinese spy balloon chu US ah hmuh niin kahthlakin a awm zui a, hei hian ram pahnih inlaichinna a tichhe zual hle bawk.
Ram pahnih inlaichinna siamthat tumin tun hnaiah US officials ten China an tlawh zur zut thung a. Chung zingah chuan Secretary of State Antony Blinken, Treasury Secretary Janet yellen leh US Special Envoy for Climate John Kerry te pawh an tel.
Hetih lai hian XI chuan Beijing chu developing world leader anga lantir zel thungin chu chu Washington kaihhruai world order thlaktu tur anga chhuah zui zel a ni thung.
Thla kalta pawh khan South Africa-a BRICS nations inhmuhkhawmnaah Xi chuan western ‘hegemony’ chu sawiselin developing ram te chu colonialism thing thla turin a fuih tawh bawk.
Brics tih hian ram panga ram thang mek te Brazil, Russia, India, China leh South Africa te sawina a ni a.
Ram paruk – Argentina, Egypt, Iran, Ethiopia, Saudi Arabia leh United Arab Emirates te chuan January thlaah an zawm dawn bawk a, hei hi Beijing tana chakna anga ngaih a ni
Joe Biden-a’n Xi tel ve lo tur pawi ti
