Angelina Jolie, kum 49, chuan thiantha a ngah lo hle niin a sawi a, mahse, chu chuan a tibuai chuang lo ni a sawiin, miin an lo phatsan fo tawh avanga thian pawl tam lo a nih thu a sawi a, a rinngam chhun mi tlemteah a insawrbing mai niin a sawi.
The ollywood Reporter-in an kawmnaah Jolie chuan thiantha ti a sawi tur a ngah loh thu hi sawi chhuakin, “Chutiang inlaichinna chu ka nei vak lo. Nu leh paten min tihsan hma vang pawh a ni thei a. Ka hnathawh vang pawh a ni thei ang. Vawi tam tak inphatsanna ka tawh tawh vang te pawh a ni mah na. Hetiang inkawmngeih leh inlaichinna tha, han tluk luh tawh theihna hi ka nei lem lo,” a ti.
Jolie hi kum 31 a nih laiin a nu Marcheline Bertrand-i’n a thihsan a, “Ka nu nen khan kan inpawhin kan inzawm tha em em a. Mahse, min kalsan ta si a,” a ti. |hiantha tia an sawi tur tlemte chauh a neih zinga Cambodian-American human rights activisr Loung Ung pawh a tel a, “Tlemte chauh an ni. Kum eng emawti chhung chu thian ka ngah tawh lo khawp mai. Ka mi rin zawng tlemte chauh ka nei,” a ti bawk.
Jolie chuan thiante bula awm aiin an chhungkaw tana a hun a tam thei ang ber hman a duh zawk niin a sawi a, Broadway musical The Outsiders a produce lai pawhin a fanu Vivienne chu a assistant angin a hmang mai a ni. Vivienne hian a hming tawpa a pa hming ‘Pitt’ tih a dah thin pawh a paih taw nghe nghe.
Jolie hian a fate bulah a hun tam zawk a hmang deuh chawt mai niin a sawi a, “Social life pawh ka nei vak lo. Min hnaih bertute (a fate) an ni a, ka thiantha berte an ni bawk. Mi pasarih inang lo tak tak kan ni a, mahse, chu chu kan chakna a ni zawk,” tiin a fate Maddox, 22, Pax, 20, Zahara, 19, Shiloh, 18, phir Vivienne leh Knox, 16, te nena an inkar a sawi bawk.
Jolie chuan, “Nu ka nih khan kum 26 mi ka ni a. Ka nun a inthlak ta vek a. Fa neih khan min chhandam ka ti mai a, he khawvela nun dan tur kawng min kawhhmuh a ni ber mai. Tunhnua ka ngaihtuah let leh chang hian anni (a fate) tan hian nung ta lo ila chuan hun khirh tak tak ka tawk nasa zawk ngawtin ka ring. Chutih rualin nu ber ka ni a, chu chu an tan pawh hmun him, tluk luhna tur ka ni. Mahse, an hlimpui leh an nuihpui bawk bawk theih ka ni tho,” a ti bawk.
Jolie-i’n rin ngam thian a ngah lo
