An inneih laiin French vineyard tha zet mai, Chateau Miraval estate, award dawng pha kawpa tha sparkling rose (wine chikhat) siam chhuahna an nei a, , mahse, an inthen hnuah he wine siamna hmunpui hi an inchuh ta a, tuna a landanah chuan he ‘War of the Roses’ an tih maiah hian Angelina Jolie lakah Brad Pitt hian hnehna a la chang rih tlat mai a, court lamah nasa lehzualin an inbei chhunzawm ngeiin a rinawm.
Brad Pitt chuan he grape huan hi a neitu zawk nihna a chuh mek a, an nupa an inthen hnuah Jolie hian he grape huana a share chu Russian sumdawng hausa Yuri Shefler hnenah a hriatpui miah lohin 2021 khan a lo hralh daih niin a puh a, Jolie ukil te chuan Pitt-a puhna hi thu belhchian dawl lo leh buaina chawh chhuah tum hrim hrim tiin an puh let a, mahse, court thutlukna chuan Brad Pitt lam a âwn ta zawk tlat a ni.
Hetiang court thu thar a awm takah chuan Pitt-a legal team-te chuan Jolie hi inremna thuthlung bawhchhia a puhin court-ah kal an tum leh ta niin report a awm ta a ni. He Chateau Miraval hi wine siam lama hmingthang tak mai niin, an sparkling rose phei chu award te pawh an lo lak pui zak zak tawh a ni a, acre 1300 laia zau niin, 2008 khan Jolie leh Pitt ten an inlei tawm a, 2014-a an inneih pawh khan he hmunah ngei hian an inkutsuih kha a ni a, tunah chuan he grape huan hi dollar maktaduai 164 man vel niin a hlutna hi an chhut a ni.
Chateau Miraval-ah hian Brad Pitt-a’n chanpual 60% neiin, Jolie-i’n 40% a nei a, mahse, Pitt hian a hnuah Jolie hi 10% pek belhin, chanpual inzat 50-50% an nei ta a. 2016-a an nupa an inthen khan Jolie hian a chanpual chu a hralh ta daih mai a, Pitt chuan Jolie-i’n a chanpual a hralh dan hi a hriatpui loh leh, 10% a pek chu hralh tel theih loh ni a sawiin, Jolie leh Yuri te indawrna chu dan anga pawm theih a nih loh thu a tan chhan ve thung a ni.
Jolie vs Pitt legal battle-ah Pitt la chak
