Pathianni zing khan Las Vegas khawpuia T-Mobile Arena-ah hlawhtling takin UFC 285 neih a ni a. Fight ngaihven hlawh berah Jon Jones chuan awlsam takin Ciryl Gane a hneh a, palian champion thar a ni. Kawnghren inchuhna dangah Alexa Grasso chuan kawnghren a hlawhchhuak ve bawk.
UFC-ah fighter ropui ber ang hiala ngaih Jon Jones hi Light Heavyweight-ah ropui takin a inlan thin a, Light Heavyweight huangah hian record hrang hrang a lo siam tawh. Kum 2011 khan UFC 128-ah Maurício Rua nen kawnghren an inchuh a, Jones hian awlsam taka hnehna changin a vawi khat nan a champion. UFC-ah a champion hmasak ber tum hian kum 23 chauha upa a ni a. UFC-ah champion thei naupang ber a la ni reng. UFC-ah champion thei naupang ber record a siam bakah hian light heavyweiht ah champion zawn rei ber, chak ngun ber leh chak zawn rei ber record a siam bawk. Chhan hrang hrang vangin hrem a tuar neuh neuh a, a kawnghren chhuhsak a nih bakah hun rei tak chhung fight hmachhawn phalsak a ni lo.
Kum 2018 khan hrem tuar zovin UFC-ah a kir a, title fight-ah Alexander Gustafsson hnein light heavyweight champion a ni nawn leh. Light heavyweight-ah hian title fight bikah vawi 14 zet a chak a, UFC title fight-ah amah aia chak hnem an awm lo. Light heavyweight-ah ropui taka a inlan hnuin palian huangah insawn a, palian champion Francis Ngannou hmachhawn a duh a, a kawnghren kawl lai a kalsan. A beisei anga tawktarh tha a hmuh loh vangin palian huangh a inlan mai lo. Kum thum chuang zet fight a hmachhawn loh vang vang hnuin palian huangah a inlan thei ta nge nge a. Francis Ngannou kawnghren kalsan chu heavyweight No. 1 Ciryl Gane nen inchuh turin ruahmanna siam a ni.
Jon Jones leh Ciryl Gane te inhmachhawn tur hian ngaihven a hlawh a. Jones hian a vawi khat nan amah aia lian a hmachhawn dawn vangin a chak zawh loh ring an tam viau. Francis Ngannou laka lo tlawm tawh Gane a hneh a nih erawh chuan Jones hian UFC fighter tha ber a nihna a chhawlchhin chiang tura ngaih a ni thung. Tichuan, Pathianni zing khan UFC 285-ah Ciryl Gane nen hian Octagon chhungah an intawng ta a ni.
Palian champion thar nih tuma insual ngaihven hlawh takah Jon Jones hi ropui takin a inlan a, palian champion ni turin minute hnih bak a mamawh lo. Jones hian na taka amah hnek fuh tumtu Gane chu mawi zetin a bum a, rang taka kuah betin a bawh thlu zui nghal. Fuh taka a khingpui nawr bet zuiin, fuh zetin Gane nghawngah a kuah bet zui nghal zet a, awlsam takin a chak zui ta a ni. Jones lakah chakin, palian champion nih beisei viau mahse Cyril Gane beiseina chu tiauchhum angin a zam ral a, a vawi hnihnan kawnghren a hlawhchhuak zo leh ta lo.
Palian champion thar Jon Jones hian palian huanga champion ngun ber Stipe Miocic hmachhawn a duh thu a sawi a. Ciryl Gane nen an inhmachhawn lai a hmuna entu Miocic hi fakin, “Heavyweight champion ropui ber i ni a, hmachhawn ngei che ka duh a, training i lo neih ngei ka beisei. Hmachhawn ngei che ka duh hi i tan thil tha lo tak a ni ngei ang”, a ti a. Miocic pawh hian Jon Jones nen inhmachhawn ngei a duh interview a hmachhawn tumin a sawi ve bawk.
Palian huanga a inlan hmasak berah awlsam taka chak a, champion thar a nih leh tak vangin Jon Jones ropuina zual a. UFC fughter ropui bera ngaih a ni reng tawhin a rinawm.
Champion thar Crasso
UFC 285 a kawnghren inchuhna dangah Mexican nula Alexa Grasso chuan submirsion hmangin champion lai Valentina Shevchenko a hneh a, flyweight champion thar a ni. Grasso hi Mexican hmeichhe zingah UFC-a champion thei hmasa ber a ni tel bawk.
Champion lai Valentina Shevchenko a khel tha fal bik lova, round thumna tawp lam thlengin endiktute point pekah hnufual zawkah a tang. Champion lai lakah point hmu tlem zawk ni reng mah se round linaah ropui takin a inlan a, a khingpui hi rek tlawmin ropui takin a champion zui ta a ni.
Jones a ropui zual zel
![](https://theaizawlpost.org/wp-content/uploads/2023/03/jones.jpg)