Joseph Zaia album hnuhnung “Tunge Maw Ka Nih Le” zaninah ngaihthlak theih dawn
Joseph Zaihming-thanga gospel album – Tunge Maw Ka Nih Le chu Darbu Music App kaltlangin chhawp chhuah a ni dawn ta. Zanin dar 8:00 hian he album chhawpchhuahna hun hi Pu Lalrothanga, President MZI in a hmang ang, Super Trio member pahnih Sailova leh Robert-a te pawhin sawihawnna an nei ang.
Khawvel A Ngam Ta album kha 2007 khan tlangzarh a ni a, hla 12 awmin zaithiam boralta Joseph Zaihmingthanga gospel album neih chhun a ni a. Album-a hla 12 bakah hian hla pathum recording buaipui lai hian siam puitlin an ni a. Khawvel A Ngam Ta album tihchhuah hnu mai khan Joseph Zaihming-thanga hian hla dang engemawzah record zuiin chu’ng hlate chu official taka tlangzarh a ni ta lo.
Khawvel A Ngam Ta album-a an dah tak loh hla pathum bakah Joseph Zaia hian hla dang paruk a record te chu remchanga tlangzarh sak a, produce sak turin Joseph Zaihmingthanga khan a producer kutah a hlan a. Kum 15 vel zet mumal taka tlangzarh lohvin a awm zui ta a ni.
Hetih chhung hian Joseph Zaihmingthanga hian heng hla te hi ama YouTube channel-ahte dahin youtubers tam takin an post chhawng nasa hle a. Hla thenkhatte phei chu single release anga tichhuakin music video te pawh a siam a ni.
Heng a hla la tlangzarh mumal loh hla pakuate hi ama producer hnena a pek hnuah Darbu Music App hnenah nikum lam khan a album dangte nen tangkai zawk leh mumal zawka a hlate vawnhim a nih theihnan tiin a lo pe bawk a. Joseph Zaihmingthanga hian Khawvel A Ngam Ta producer pawh be rawnin he album ngei pawh hi Darbu Music App-ah hian dah a ni.
Tuna a hla tlangzarh loh thenkhatte pawh Darbu music app enkawltute hnenah hian a lo pe tel nghe nghe a, Darbu lam hian mumal taka la tlangzarh loh a nih avangin an app atang pawh hian a la chhuak zui a ni.
Tunge Maw Ka Nih Le album-ah hian hla pakua awmin, hla thenkhatte chu YouTube lama lo dah tawhte an ni a, hla thar, ruahtham loh kan han tih ang hi a ni lo tih producer te hian mipuite hnenah an sawi a, mahse mumal taka tlangzarh an nih loh avangin a ngaithla tawh leh a hla hmelhriat tawh an tam lo hle ang.
Zanina ngaihthlak theiha chhawpchhuah tur zingah hian Kristian hla bu a hla lar tak Khawiah Pawh Lal Isua Nen tih leh Pastor PC Liansailova hla Kei Aia Hmangaihtu Che An Awm Lo (Studio Version) te a tel ang.
Tunge Maw Ka Nih Le ngaihthlak theiha chhawpchhuah a nih hma hian youtube channel thenkhat – Robert Lalduhzuala official channel, Malsawma Photography channel leh Mizo Official Channel-ahte Super Trio-a a member pui Sailova leh Robert-a te’n a sawihawnna an nei ang a, Pu Lalrothanga, President, MZI in ngaihthlak theihin a chhawp chhuak zui ang.
Tunge Maw Ka Nih Le album atanga sum hmuhte hi Joseph Zaia’n a kalsan tak a fate tan album producer te chuan an dah dawn a. Album lei theiha chhawpchhuaktu Darbu music app te pawhin artiste dangte hnena commission (10%) an lak thin pawh la lovin a thlawn liau liauvin Joseph Zaihming-thanga album hnuhnung hi an buaipui sak dawn a ni.
A Tunge Maw Ka Nih Le album-a hla awmte:
A Khawngaihna A Tawk
Aw Ropui Ber
Hmanhmawh Rawh
Ka Lo Hre Tlem
Kei Aia Hmangaihtu Che An Awm Lo
Khawiah Pawh Lal Isua Nen