Aigupta-a Josepha tangkaina ang chiah khan Mizoramin BJP MP a neih chuan state harsatna ata khaichhuak turin a tangkai dawn a, Union minister hial nih theihna a inhawng tih BJP Mizoram president Vanlalhmuaka chuan a sawi.
BJP Mizoram Pradesh hian Inrinni khan Mission Veng Bazar-ah Lok Sabha MP inthlan campaign an khuhhawng a. BJP Core Group member, Supreme Court advocate Lalramtiama’n a khuhhawng.
Thusawitu State BJP president Vanlalhmuaka chuan, MP inthlanah seat 370 la turin BJP an inbuatsaih a, hmarchhaka MP-ten an state mamawh hrang hrang an dilchhuak thei a, chutiangin Mizoram pawhin MP awmze nei, mamawh sawichhuak a, state sawrkar harsatna sawipui tur BJP MP nei ve ang u, tiin mipui an sawm tih a sawi a ni.
NE state MP zingah Union minister an awm ta nual a, chutiang chu Mizoram pawhin a nei ve thei tih sawiin, “Chu BJP MP chu Mizoram sum harsatna lak ata chhanchhuak turin a pawimawh hle dawn a, sawrkar sum indaihlohna phuhru turin MP thil tithei kan nei ve thei. Bible-a Josepha chanchin ang khan, Aigupta rama Israel fate tan an mamawh sawi sak a, lo puitua atang ang khan, Mizoramin BJP MP kan neih chuan a ni thei dawn. Josepha khan Aigupta pathian a be ngai lo angin, Kristian MP Mizoram tana ding tur kan thlanchhuah a ngai,” a ti.
MLA inthlanpuia an manifesto ami kha an auhla a la ni reng a, budget piahlamah BJP leh a thawhpuite sawrkarna state-a an tih angin, Mizoram tana central hruaituten state budget khawih buai loa sum min pek an tum chu cheng vaibelchhe 30000 chuang a ni a, chumi haichhuak tur chuan a chabi neitu BJP a ni tih Vanlalhmuaka hian a sawi.
MLA Dr K Beichhua chuan Mizoramah BJP kan hmuh dan ala hniam hle a, nimahse khawvela economy thangchak ber zing ami kan ni, tiin, “Keini, state rethei tak, thawh chhuah mumal tak neilo hian ‘central blessing’ kan dawn theihna turin a chabia kan lo insiam ve a, MP inthlanah BJP candidate vote turin mipui ka sawm a ni,” a ti.
Josepha angin BJP MP neihin awmzia nei dawn – MBJP president
