Palian huanga boxer lar Anthony Joshua hmachhawn tur tihchian a ni a. Palian champion hlui Joshua hian UFC palian champion hlui Francis Ngannou a hmachhawn dawn tih promoter Eddie Hearn-a’n a tichiang.
Boxing palian huanga boxer hriat hlawh, champion hlui pahnih; Anthony Joshua leh Deontay Wilder te chu inhnek turin an lo indawr lawk thuak tawh a. Inhnek an hmachhawn hnuhnung berah Joshua a chak laiin Wilder a tlawm vangin an indawrna hi a lo thlawnah a chang zui nghal. Anthony Joshua hian a khingpui hnuhnung ber Otto Wallin a hneh a. Hetihlai hian Wilder erawh chu Joseph Parker lakah a tlawm thung. Parker lakah Wilder chak lo hi Joshua nen an indawrna titlawlhtu a ni.
Wilder nen an inhmachhawn theih tak loh vangin Joshua khingpui tur an dap kual nghal a, Francis Ngannou nen an inbe rem thei ta a ni.
UFC Palian champion hlui Ngannou hian October 2023 khan a vawi khat nan Professional boxing a khel a. Palian boxer tha bera ngaih Tyson Fury lakah beisei phak baka thain a inlan. Fury hneh hmasa bertu a ni tura ngaih a nih laiin split decision hmangin tlawm zawkah tantir a ni a. He result hian sawisel a hlawh a, inhnialna a chawkchhuak nasa zui hle nghe nghe. Fury a hmachhawn hnuin khingpui langsar a nei zui leh zat dawn a. Anthony Joshua a hneh thei a nih ngat chuan Cameroon boxer Ngannou hian kawng-hren chuh theihna rem-chang a neih zui theih a beiseiawm.
Joshua leh Ngan-nou inhnek hun atan hian March 9, 2024 ruahman a ni a, hemi zan hian Saudi Arabia in inhnek lian a thleng leh dawn. Saudi Arabia hian February ni 14-ah inhnek ngaihven hlawh zet mai a thleng dawn bawk a. Palian huanga kawnghren kawltu pahnih Tyson Fury leh Oleksandr Usyk ten palian huanga tha ber nih an inchuh dawn. He inhneka chak zawk zawk hi palian huanga kawng-hren pali kawl kawp thei hmasa ber an ni ang.
Joshua hmachhawn tur Ngannou
