Palian huanga boxer langsar pahnih Anthony Joshua leh Deniel Dubois te chu IBF belt inchuh turin an indawr tan a, September ni 21-ah an inhmachhawn theih a beiseiawm.
IBF chuan kawnghren pali kawl khawm mektu Oleksandr Usyk-a’n Tyson Fury a hmachhawn nawn leh dawn vangin Usyk hi IBF belt an chhuhsak dawn. IBF belt hrengtu tur zawn mek a ni a, interim champion Deniel Dubois leh Anthony Joshua te inchuhtir an tum. Joshua leh Dubois te hian indawrna an nei tan a, an indawrna a kaltluang viau rih niin promoter Frank Warren chuan a sawi. An inhnek hun atan September ni 21 tin zawn phawt a ni a. An inhnekna hmun atan England khelmual ropui ber Wembley an beisei bawk.
Briton Daniel Dubois hian pathianni zing khan interim belt a chuhpui Filip Hrgovic chu round riatnaah knock-out in a hneh a, champion lai lawk a ni. Hrgovic lakah a chak vangin Anthony Joshua hmachhawn theihna hun tha a nei a. British boxer pahnihin IFB belt an inchuh zui ngei dawn niin a lang. Kum 26 mi Deniel Dubois hian professional huangah inhnek vawi 23 a hmachhawn tawh a, vawi 21 chakin, vawi 20 zet a khingpui a knock out tawh a, tlawm zawkah vawi hnih a tang ve tawh bawk. Dubois hi a kum a la naupang a, world champion nih theihna hun tha tak a nei.
British boxer lar, Olympic leh palian champion ni tawh bawk Anthony Joshua hian professional huangah inhnek vawi 31 a hmachhawn a, vawi 28 chakin, a khingpui mi 25 a knockout a, vawi thum a tlawm tawh. Palian huanga boxer lar ber pawl niin kawnghren pathum; WBA, WBA leh IBF kawnghren a lo kawl khawm tawh thin. A kawnghren kawl pathumte hi Olesksandr Usyk lakah a hloh a. Usyk nen inhnek nawn leh mah se a la let thei ta chuang lova, kawnghren kawl nei lovin a awm mek. Daniel Dubois lakah hian rinkai zawk a ni a, kawnghren lak let leh theihna hun remchang a nei tura ngaih a ni.
IBF kawnghren kawl mektu Oleksandr Usyk chuan Tyson Fury nen an inhnek nawn leh hma chu a kawnghren chhuhsak rih lo turin a ngen a. Usyk ngenna zahawm tiviau mah se hlihsak turin thutlukna an siam zui ta tho thung a. Palian huangah IBF kawnghren hrengtu thar an awm theih phah dawn ta a ni.
Andy Ruiz Jr leh Oleksandr Usyk laka tlawm tah Joshua hian Dubois hneha IBF kawnghren a la a. Fury-a’n Usyk a hneh let thei a nih bawk chuan British boxer lar pahnih Joshua leh Tyson Fury te hi kum 2025 an kawnghren pali inchuhin an inhnek a rinawm.
Joshua leh Dubois an indawr
