Chinese Li Zhihao chuan Rubik’s cube pathum juggling chungin minute thum leh second 16 chhungin a rem dik vek hman a, Guinness World Record a siam. A hmaa hetiang record awm sa pawh ama siam tho a ni a, a record hmasa chu minute 3 leh second 29 niin, a record hmasa hi second 13-in a rawn khum ta a ni.
Zhihao, kum 22, hian record hi television talent show Lo Show dei Record-ah a siam a, Rubik’s cube pathum hi a kut pahnih hmangin a vawr kual char char a, engtik lai pawhin Rubik’s cube pakhat tal chu boruak-ah a awm ngei ngei tur a ni. A kut ding leh veilamin a indawn kual chhawk char char a, chutianga tipah chuan Rubik’s cube chu a rem dik vek thei a ni.
Li Zhihao-a’n record a siam hmaa hetiang record siamtu chu Columbia lam chhuak Angel Alvarado a ni a, ani hian 2021 khan Rubik’s cube pathum juggling chungin minute 4 leh second 52-ah a rem dik hman a, ama record hi May 2022-ah rawn khum lehin, hemi tum hian minute 4 leh second 31-ah a zo hman. Alvarado hmaa record siamtu chu Chinese tho Que Jianyu niin, 2018 khan minute 5 leh second 2-ah a zo hman ve thung.
Juggling chunga Rubik’s cube pathum rem dik rang record siam
