Parliament monsoon session chu July 20-ah tan a ni ang a, August 11 thleng a awh ang tiin Parliamentary Affairs Minister Pralhad Joshi chuan a sawi a. Tun hi Manipur buaina chhuah hnua sorkarin Parliament a hmachhawn tumkhatna tur a ni. Opposition-te chuan Rajya Sabha lamah Delhi ordinance chungchangah sorkar an bei tura ngaih a ni a, he ordinance hmang hian thlan tlin State sorkar thuneihna chu nasa taka laksakin an awm a ni.
Joshi chuan, “Parliament Monsoon Session 2023 chu 20th July atangin 11th August thleng neih a ni ang a. Party tin te Monsoon Session a Legislative Business te leh thil dang te hlawk taka kalpui a nih theih nan hma la turin ka ngen a ni,” tiin a sawi.
Opposition-te chuan Manipur chungchanga Prime Minister Narendra Modi ngawih chuh reng chu an sawisel nasa hle a. June 24-a all-party meeting neihnaah pawh Union government chuan nunna chan 131 an awm tawh a, nunna chan hi an pung zel bawk a. Mahse, all-party in Manipur State tlawh an ngiatna chu hnawlin a awm thung a. Congress president hlui Rahul Gandhi chu Oppoition leader langsar zinga Manipur tlawh awm chhun a ni a, Manipur chungchangah hian sorkar chuan zawhna hautak tak tak a hmachhawn ngei dawna ngaih a ni.
“Sorkar hian thil hrang hrang opposition tena mipui tana an aupuite sawihona hun remchang an siam kan beisei a, chung zingah chuan Prime Minister ngawih chuh tlat pawh a tel,” tiin Congress general secretary (communication) Jairam Ramesh chuan a sawi.
Oppostion te chuan tun hnaia Madhya Pradesh-a Prime Minister in a aupui Uniform Civil Code (UCC) sawiho pawh an tum dawn bawk a. UCC chungchangah party tam ber te chuan an dinna an la sawi lang lo va, hei vang hian sawihonaah an dinna a hriat tura ngaih a ni.
Opposition unity chu sorkarin May 19 ordinance Government of National Capital Territory of Delhi Act, 1991 amend a tumna chuan a tilang fiah hle tura ngaih a ni a. He mi hmang hian Delhi-a mipui thlan State sorkar thuneihna chu nasa takin a chhuhsak a ni. Aam Aadmi Party convenor leh Delhi Chief Minister Arvind Kejriwal chuan Oppositon party dang tena an thlawp theih nan hma a la nasa hle a, Opposition an lungrual chuan Rajya Sabha-ah an dang chat thei a ni.
AAP tena an nawr chiam chungin June 23-a Opposition inhmuhkhawmnaa tel Congress te chuan an dinna an la sawi chiang duh lo thung a. Mahse, AAP te hnenah ‘anti-constitutional bill’ duh zawngin vote an thlak loh tur thu an tiam tia sawi a ni thung.
Congress thlawpna nei mah se Rajya Sabha-ah Oppostion te arithmetic a tha vak chuang lo. NDA ten member 102 an nei mek a, Oppositon party 18 te chuan member 105 an nei a. Party dang pasarih te chuan member 23 nei bawkin chung zingah chuan Biju Jantan Dal leh YSR Congress te an te chuan member pakua ve ve neiin pawimawh bera ngaih an ni a. Mahse, heng party pahnih te hian tunhnai kum kua chhungin sorkar lai BJP te thlawp zawng hlirin vote an thlak a. Mahse, he bill hi ‘federalism’ beihna anga ngaih a nih avangin AAP te chuan an lama vote an thlak an beisei thung a ni.
July 20-ah Monsoon Session tan ang
