Kuhva chungchanga July ni 5 thlenga sorkar nghaktu kuhva chingtute’n an kal zel dan tur ngaihtuah an tum a, Zirtawp zanah pawh khan hemi chungchangah hian khaw hrang hranga kuhva chingtute’n online ro an rel tih thu dawn a ni.
Vairengte leh a chhehvela kudam hrang hrangah foreign atanga lakluh kuhva ip 9635 a awm a, hei hi man turin Vairengte, Bilkhawthlir, Hachhek Bial Kuhva Chingtu Joint Committee te’n sorkar an phut a, July ni 5 thleng an ngaichang ang tiin thu an dah a ni.
Kuhva Chingtu Joint Committee te chuan July ni 5 thlengin tih hi anmahni thu-a bituk an ni lo a, Kolasib police te’n July ni 5 hmain district thuneitute hnenah criminal complaint an thehlut ang a, kuhva hi an man ang tih an sawi vanga July ni 5 hi nghak an nih thu an sawi.
Kuhva Chingtu Joint Committee te’n The Aizawl Post an hrilh danin, June ni 26 khan Vairengte leh a chhehvela kudam hrang hrangte hi police te’n an endik a, thuhretu-ah kuhva chingtute an tang a, kudam hrang hrangah ip 9635 an awm tia chhinchhiah a ni.
July ni 1-ah Kolasib district thuneitute nen an inhmu a, kuhva hi police te’n an la man loh thu an sawi a, a tukah kudam an endik leh a, kuhva ro ip 5741 a lo awm tawh lo a, ip 3894 chauh a awm tawh tih hmuhchhuah a ni.
Kuhva Chingtu Pawl hruaitute chuan an hmalak dan tur sawi lawk a awm lo a, an rel chawp dawn tih an sawi. Kudam atanga kuhva bo chungchangah sawi tur an neih loh thu, sorkarin a chhui zui turah an ngaih thu an sawi bawk.
July ni 5 nghaktute’n kal zel dan tur ngaihtuah dawn
