June 23-ah Hulhliap tan dawn
Ruihhlo ngaite enkawlna tura sawrkarin ruahmanna a siam ‘Hulhliap Short Stay Centre’ (SSC) chu karleh, June 23 atangin hawn tan tum a ni tih Social Welfare minister Lalrinpuii chuan a sawi.
Social Welfare department leh School Education department tangdun chuan Ningani khan middle school zirtirtute tan damdawi hmansual kaihhnawiha an hriat tur tul inhrilhna an buatsaih a. Hmanpuitu Lalrinpuii chuan ‘Hulhliap SSC’ hi Synod Revival Camping Centre Neihbawih-ah June 23 atanga hawn tum a ni a. He hmunah hian June 26-ah ‘International Day Against Drug Abuse & Illicit Trafficking’ pualin hun hman tum a ni tih a sawi.
Naupang te tea ruihhlo khawih an tam ta hle chu lungchhiatthlak a tih thu Social Welfare minister hian sawiin, zirlai naupang zingah ruihhlo hmansual laka fihlim tura zirtirna pek a pawimawh takzet tih a sawi.
Naupangte chu an hun tam zawk school-a hmang an nih avangin zirtirtuten naupang nunah hmun pawimawh tak an luah tih sawiin, “Naupangte ruihhlo laka an filhim theihnan zirtirtuten mawhphurhna lian tak in nei,” a ti.
Naupangte ruihhlo hmansual laka ven an nih theihnan zirtirtute hnena ruihhlo leh a kaihhnawih hrilhhriatna atan leh naupang hnena an zirtir chhawn ve theihnana he thil hi buatsaih a ni.
June 23-ah Hulhliap tan dawn
