June 23 tlai atanga Champhaia ruahsur nasaah lei min nual

June 23 tlai atanga Champhaia
ruahsur nasaah lei min nual
June 23 – Pathianni khan tlailam atangin Champhai khawpui leh district chhung hmun dangah ruah a sur nasa a, leimin a awm nual a, nunna chan phah erawh an awm lo. June 24 – Thawhtanni khan district bawrhsap-in school chawlhah a puang a, ruahsur pawh a ziaawm chho tan nia sawi a ni.
Chhiatna thlenna hmun hrang hrang hi Thawhtanni khan District Disaster Management Authority Champhai chairman, bawrhsap Mohammad Aaquib chuan a hmunah a enfiah a. Harsatna awm mek chinfel dan tur an sawiho nghal.
Thawhtanni vek khan DDMA Champhai hi an chairman ho hian an thukhawm a. Chairman chuan June 22 tlai atanga ruah tam tham tak a sur avanga an district leh khawpui chhungah chhiatna nasa tak a thleng chu pawi a tih thu a sawi a. Harsatna neite pui turin bawrhsap pisa an inhawng reng a, chhiatna thleng avanga harsatna awm thei sutkian a nih theihnana hma latu VC, YMA, PWD, P&E, NHIDCL, SBCC leh department hrang hrang chungah an lawm tih a sawi a ni.
Zonal officer-ten an bial theuha chhiatna thleng an report a. Department hotuten an department kaihhnawih theuh report an pe bawk.
Champhai district-ah hian May 30 atang khan chhinchhiah theih chinah leimin hmum 265-ah a thleng tawh a, leimin avanga in chhia 15 awmin, leimin vanga thi mi pathum leh hliam pahnih an awm tawh a ni.