Kumin June thla chhung khan dan bawhchhia lirthei 222 man an ni.
DTO Aizawl chhinchhiah danin, thla kalta chhung khan dan bawhchhiat avanga enforcement staff-ten lirthei 222 an man zingah bungraw phur lirthei te (light goods vehicle) an tam ber a, 72 an ni. Maxi cab 65 man niin, bungraw phur lirthei lian (heavy goods vehicle) 24 man an ni a, hengte hi a tam zual deuh an ni. Dan bawhchhia man zingah hian two wheeler taxi pakhat leh rental car pakhat awmin, a tlem ber an ni.
Enforcement staff ten lirthei an enfiah zawng zawng hi 884 a ni a, heng zinga 222 hi dan an bawhchhiat avanga man niin, document an hrensak 42 an awm a ni. A hmuna sum an chawi tur zat ang chawi tur nei lo emaw tlan tlang ang chi, e-challan pek an ni.
Dan bawhchhia lirthei neituten sumfai an chawi hi a vaiin Rs. 8,61,500 a ni a; a vai hian sawrkar sum bawmah chhunluh a ni.
Transport department hotute chuan lirthei khalhtute chu signal light a tul hun atana hmang ngei ngei turin an chah a.Zanah lirthei dang tawhin ‘dim light’ hmang thin turin an chah bawk.
Lirthei neitu leh khalhtute chu late fee chawi pumpelhna’n chhiah leh fee pek tur a hun taka pe thin turin an chah a. Lirthei hlui leiin document hrechiang lo leh nei mumal lo chu lei lo turin an chah bawk.
June-ah dah bawhchhia lirthei 222 man
