Jung Kook chu BTS member zinga Billboard Hot 100 (singles) chart-a solo artist anga No.1 thei hmasa ber dawttu niin, Jimin hnung a zui a, hetihrual hian Jason Aldean hla thar ‘Try That in a Small Town’ pawh No.2-ah a debut.
Billboard Hot 100 chart hi kar khat chhunga US-a hla lar dan tehna niin, chart ranking siam nan hian all-genre US streaming (official audio leh official video), radio airplay leh sales data te chu tehna pawimawh a ni.
Jung Kook “Seven” featuring Latto hian stream maktaduai 21.9 leh radio airplay maktaduai 6.4 nei theiin, digital leh CD hralhna pawh 1,53,000 a tling thei a, hei hi Hot 100 chart-ah a No.1 pui ta a ni. Jung Kook tan he chart-a solo artist anga chart No.1 a kai vawi khatna a ni a, top 10-ah pawh a vawi khat lanna a ni bawk. Chart-ah erawh 2022 khan Charlie Puth nena an zai dunna ‘Left and Right’ chu No.22 a lo kai tawh a, ama hla ‘Stay Alive’ chu No.95 a kaipui tawh bawk.
BTS group member pahnih chu solo artist angin he chart-ah hian No.1 an kai ta a, April thla khan BTS member dang Jimin chuan a hla ‘Like Crazy’ chart No.1 a lo kaipui tawh bawk a ni.
BTS hian group angin he chart-a No.1 kai thei hla paruk an nei tawh a, Jung Kook leh Jimin ten pakhat ve ve an nei tawh bawk a, tihian BTS chu The Beatles, The Black Eyed Peas, Destiny’s Child, Genesis leh One Direction te huangah lut vein, group anga No.1 kai thei, group member pakhat aia tam solo artist anga No.1 ni leh thei zingah an tel ve ta a ni.
Hmeichhe rapper Latto tan pawh tun hi Hot 100 chart No.1-a a lan vawi khatna a ni a, top 10-ah erawh a vawi hnih lanna niin, nikum April thla khan ‘Big Energy’ hla avangin No.3 a lo kai tawh a ni.
Jason Aldean hla thar sawi hlawh tak mai, thenkhatin tharum thawhna thlawpna hle leh racist rawngkai tia an sawi sel, CMT pawhin a music video ni thum an play tawh hnuah an hnuhkir leh tak hial ‘Try That in a Small Town’ chu stream maktaduai 11.6 leh rado airplay maktaduai 7.3 bakah sales 2,28,000 tlingin, No.2-ah a debut. Jason Aldean tan he chart-a top 0 kai thei hla pahnih a neihna niin, July 2011 khan ‘Dirt Road Anthem’ remix featuring Ludacris chu No.7 a lo kai pui tawh a ni.
Chart-ah kar 14 chhung No.1 tawh Morgan Wallen ‘Last Night’ chu No.1 atangin No.3-ah a tawlh, Luke Combs-a’n Tracy Chapman hla hlui a cover ‘Fast Car’ chu No.2 atangin No.4-ah a tawlh ve ta bawk.
Rema leh Selena Gomez ‘Calm Down’ chu No.4 atangin No.5-ah a tawlh a, Gunna ‘Fukumean’ chu No.7 atangin No.6-ah a insawn hret a, chart No.1 hlui Olivia Rodrigo ‘Vampire’ chu No.3 atangin No.7-ah a tawlh a, Taylor Swift ‘Cruel Summer’ chu No.9 atangin No.8-ah a insawn a, chart No.1 hlui Miley Cyrus ‘Flowers’ chu No.6 atangin No.9-ah a tawlh a, Lil Durk ‘All My Life’ featuring J.Cole chu No.8 atangin No.10-ah a tawlh ta bawk.
Jung Kook ‘Seven’ feat. Latto a No.1
