BTS member Jung Kook chuan a solo full-length album hmasa ber tur chu ‘Golden’ tih a nih thu leh November ni 3-ah a tlangzarh dawn tih a puang a, he album-ah hian hla 11 a awm dawn a, Billboard Hot 100-a No.1 a lo kaipui pawh, Latto nena an thawh dunna ‘Seven’ bakah Jack Harlow nena an hla thar ‘3D’ te pawh a dah tel ang.
A album title tur ‘Golden’ tih hian Jung Kook-a’n solo artist anga a hun duhawm a hmanna theme a kawk a, ‘Golden Maknae’ of BTS, ti a hriat lar Jung Kook album thar tur ‘Golden’ album hi nimin atang khan pre-order a tih theih tawh a ni.
Jung Kook hian solo singles a lo nei nual tawh a, ‘Euphoria,’ ‘My Time,’ ‘Still With You,’ leh ‘My You’ bakah Lauv leh Charlie Puth a thawhpuina ‘Left and Right’ te pawh a lo tichhuak tawh bawk a ni.
Tunah hian Jack Harlow nena an hla thar ‘3D’ chu UK singles chart-ah No.2-ah a debut thein dawn niin a lang a, hei bakah hian ‘Seven’ kha July thla chawhnu UK Singles chart-ah No.3 a kai a, solo Korean act-ah chuan UK Singles chart-a debut sang thei ber a la ni.
Jung Kook, kum 26, hi a thian te pathum South Korean sipai a a inziah tawh laiin ama tawkin a che chhuak rih ta zel a, tun thlengin BTS member pathum- Suga, Jin leh J-Hope te chu sipai-ah an lut tawh a, group ang chuan 2025-ah an rawn kir leh thei dawn chauh a ni.
Jung Kook solo album ‘Golden’ Nov-ah
