Khawvelin Justin Bieber a hmelhriat tanna, Ludacris nena an music video ‘Baby’ kha kan la hria ang chu maw, he music video khan YouTube-ah vawi tluklehdingawn 3 en a hlawh ta. Thawkkhat lai khan he music video hi YouTube-a ‘dislike’-tu ngah ber te pawh a lo ni tawh bawk.
‘Baby’ music video hi 2010-a an tlangzarh kha a ni a, a naupang aw sin sang vah mai leh a dance move smooth tak mai nen chuan pop music khawvelah tun kum 10 chhung zet chu khawvela zaithiam lar ber te zinga mi a ni ta a ni. Khatih lai khan Bieber pawh tleirawl kum 15 mi chauh a la ni a, bowling alley-ah chhas a’n chhai vel te khan mi a hip riau a, Ludacris-a rap verse pawh a nalh narawh e.
‘Baby’music video hi an tlangzarh kumah khan YouTube-a music video entu ngah ber niin, vawi maktaduai 246 en hlawh theiin, Lady Gaga ‘Bad Romance’ a lehpel kha a ni a, mak ve ang reng tak chu 2018 hmalam zawng kha chuan he music video hi YouTube-a ‘dislike’ hlawh tam ber a ni ngar ngar bawk.
‘Baby’ hi Bieber-a album hmasa ber ‘My World 2.0’ atanga a lead single a ni a, a tlangzarh hlimah Billboard Hot 100 (singles) chart-ah No.5 a kai a ni. ‘Baby’ hi Bieber-a music video zingah YouTube-a vawi tluklehdingawn 3 en hlawh thei hmasa ber a ni lo va, 2015-a a music video ‘Sorry’ chuan vawi tluklehdingawn 3.7 en a hlawh tawh bawk a ni.
Bieber sawi takah chuan 2016 khan YouTube-a a music video hrang hrangin entu a neih belhkhawm chu tluklehdingawn 10 a tling a, zaithiam zinga hetiang ti thei hmasa ber a ni bawk.
Justin Bieber-a ‘Baby’-in vawi 3B view hlawh tawh
