MNF MP candidate K Vanlalvena chu midang, a lar dan chu lar dan tha nia a hriat thu MNF senior vice president Dr R Lalthangliana chuan a sawi.
Thawhtannia Lunglei khawchhunga street campaign an neihah MNF senior vice president chuan Pu K Vanlalvena chu Rajya Sabha-ah kum 3 leh thla 8 hmang mek a ni a. Hetih chhung hian din chhan tha tak neiin tum 15 huai takin a ding a. Manipur-a Kristian unaute tawrhna nasa tak an tawh chungchangah huaisen taka ding ngam awmchhun, central sawrkar do ngam a ni tih a sawi.
Chhimtawp Zorinpui, Zochachhuah, Myanmar atanga kawng sial hna muang lutuk chu ke ngatin km.8 a kal a, contractor leh hnathawktute a va nawr a, central sawrkar beng a thleng tih sawiin, “He mihring hi chu a danglam tawp a ni an ti hial a; a lar dan hi lar dan tha niin ka hria,” a ti.
MP candidate K Vanlalvena chuan vote chi a ni dawn em ni tih mipui atangin zawhna a awm thei tih sawiin, “India ramah NDA chuan sawrkarna siam mekin, NDA-ah party hrang hrang 40 vel an awm a. Kristian MP-te hian NDA chhuahsan vek ila, India ramah Kristian kan tlem si a, NDA-ah hian krisrian MP-te kan awm a ngai. Zaa pathum vel lek pek pawh awm ila, Kristiante tan kan tangrual vek a, eng kohhran nge tih lam kan sawi ngai lo,” a ti.
Pathian tan, ram tan, kan hnam leh sakhua vawnghim turin NDA lama awm ve a tul hle zawk tih sawiin, NDA all party meeting-ah vawi tam a tel tawh a, na tak takin thu a sawi ve a, a chhunga awm an ni a, tute emaw sawisel thintute aiin an hrechiang zawk tih a sawi. “Min thlangtling a nih chuan kan sakhua leh Zo hnahthlak hnam hrang hrang tan theihtawp chhuahin hma ka la zel dawn a, kan ram tana tha lo turah chuan eng tik hunah pawh NDA zawmna hi ka titawp nghal ang,” a ti.
K Vanlalvena hi mi danglam a ni – Dr R Lalthangliana
