K Vena’n Parliament-ah Manipur chungchang sawi la tum

July ni 20-ah Parliament monsoon session an tan a,
Manipur buaina chungchang vanga inau buaiin hun an hmang ni tin. Mizoram MP (Rajya Sabha) K Vanlalvena’n Manipur chungchang hi aupui a tum a, la hlawhtling lo mah se chawlhkar tharah pawh aupui a la tum.
July ni 21 (Zirtawpni) khan ni 24 (Thawhtanni) atan Manipur chungchanga adjournment motion putluh phalna dilna a thehlut. Mahse Thawhtanni hian an inau buai a, a dilna remtih a ni lo. A tuk atan a dil a, a hlawhtling lo chungin a tuk atan a dil leh zel. A la hlawhtling lo a, Thawhtanni atan hian Zirtawpni khan dilna a thehlut leh.
“A theih ang anga kal zel ka tum a, chuvang chuan dilna pawh ka thehlut a, ka thehlut zel a ni e,” K Vena chuan a ti.
Kar hmasa Nilaini khan K Vena hi chairman hmaah dingin a dilna phalsak turin a ngen a, mahse a hlawhtling lo.
Manipur chungchang sawi tumin MP 47-in adjournment motion putluh hi an dil a, chung zingah chuan K Vena tih loh MP dang chu opposition member an ni.
Amah K Vena sawi danin, Zirtawpnia diln a thehluh lehin a lo dawngtu officer pakhatin hetiang hi rulling MP-in an tih ngaih loh thu a lo sawi a, K Vena chuan a hriat thua chhangin, ‘Kristian MP ka ni a, biak in 300 vel tihchhiat a ni tawh a, ka chipui mi 100 chuangin nunna an chan tawh bawk a. Chumi chungchang ka sawichhuah theih hma chuan adjournment motion notice hi ka rawn thehlut zek dawn,’ tiin a chhang a ni.
MP pasarihin short discussion neih an dil bawk a, an zingah hian K Vena a tel. Hemi diltu MP pasarihte hi chu NDA member vek an ni.
K Vena chuan a khawi emaw zawk zawk pawh hlawhtling se a duh thu a sawi a, “A pahnihah ka hlawhtling lo a nih pawhin a khawi emaw zawk zawkah hian hlawhtling ila ka lawm tho ang. Manipur buaina chungchang hi aupui ngei ka duh a, chumi tur chuan theihtawp ka chhuah a ni,” a ti.