Prime Minister Narendra Modi chuan ‘a damchhung chuan Indian Constitution in SC/ST leh BC te tana reservation a pek chu engti kawng pawhin Muslim te hnenah pek a ni ve ngai lovang’ tiin a sawi.
“Constitution siamtu Dr. B.R. Ambedkar khan sakhuana behchhanin quota a siam lo va, SC/ST/BC te tan chauh a ni a siam ni. Congress party leh an ‘prince’ (Rahul Gandhi) te hian marginalised section te rights chu chhuhsakin an vote bank politics hmangin Muslim te tan quota an pe a ni” tiin a sawi.
Modi chuan Zaheerabad a public meeting a neihnaah Indian Constitution chu a zah bur thu a sawi bawk a. Indian Constitution kum 75-na chu ram pumah a term thumna chelh laiin ropui takin hman a ni ang a ti bawk a, Congress party tena an rorel laia pawi an khawih te pholan a ni ang a ti bawk.
Prime Minister chuan Rahul Gandhi chu a hming lam duh miah si lovin a kap na hle a, ‘Shehzada’ tia kohin Manmohan Singh sorkar cabinet in note an siam te chu constitutional propriety zahna nei hauh lovin media hmaah a pawtthler vel a ti bawk a. “Tunah kan lak atanga Constitution humhim a ngai tiin a sawi leh a nia. Constitution hi ka tan chuan lehkhabu thianghlim Gita, Bible emaw Quran tluk a ni” tiin a sawi bawk.
MP atana thlan tlina a tih hmasak ber chu Parliament hmaa a bawhkhup thu sawiin, kum 2019-a thlan tlin a nih nawn khan Central Hall-ah Constitution dahin zahna a hlan hmasa phawt a ti bawk a. Amah chauh chu Gujarat Chief Minister sai cheimawia Constitution phurhtira kalpuitu a ni a ti bawk a. Chutih laiin Congress prince leh a thuihruaite chuan Indian Constitution leh democratic institution-ah tih engmah an nei ve lo a ti bawk.
“Thuneihna an chan chhung chuan engkim a tha vek a, thuneihna an chan loh chuan parliament tibuaiin, Election Commission leh EVM te chu an vote bank politics avangin an sawisel ang. Constitution tihmingchhe turin engkim huamin chet an la ang” a ti bawk a. Congress te chuan principle panga – dawt, vote bank politics, mafia/anti-social elements, eirukna leh dynasty politics te chu an kalpui ber a ti bawk.
Telangana Congress leh RR duo – Rahul Gandhi leh Chief Minister A. Revanth Reddy te chu fake video siama soceity tibuaia democracy nuihsawhah a puh bawk a. Congress in Andra Pradesh a sorkarna an siam lai kha ‘laboratory of appeasement politics’ kalpuiin BCs te share chhuhsakin Muslim te quota an pe a ni. Lingatays, Marathas leh caste dang 26 tena OBC list a tel an ngiatna erawh an uksak miah lo thng a Madigas tena SC list a tel an ngiatna pawh an uksak lo a ti bawk.
Congress kaihhruai INDIA alliance chuan opposition status pawh an hmu pha lo vang a ti bawk a, kumin inthlanah Congress te chuan an MP neihtlem ber tum an tawng ang a ti bawk.
“Ram temple satu chu Modi ni lovin in vote a ni a. In vote hi engkim a ni a, Congress te tan erawh an vote bank chu pawimawh ber a ni thung,” tiin Modi chuan a sawi bawk.
Ka dam chhungin Muslim ten quota an nei lovang : PM Narendra Modi
