- Zoramthanga
Ama chanchin a ziahna bu tih chhuah a nih hunah zalenna sual laia thil thlen dan dik tak a hriat theih dawn tih MNF hruaitu Zoramthanga chuan a sawi.
Thawhtannia Mizo Hnam Runa inkhawmah Zoramthanga hian ama chanchin ziahna lehkhabu ‘From Rebel To Leader’ tih chu khawvela publishing company lian ber pawl Penguin-in a chhuah sak dawn tih a sawi a. Hemi tur hian inremna pawh an ziahfel tawh thu a sawi.
A lehkhabu a chhuah hunah zalenna sual laia thil thlen dan dik tak a hriat theih dawn tih a sawi a. Mizo nationalism chu Pathianin a tawp mai a phal loa, a sang tel nunna hlanna leh a sing tel tawrhna avanga lo piang Mizo nationalism a vul zual zel dawn tih a sawi a ni.
MNF an sawrkar a, an tla leh thin a, an sawrkar leh thin tih MNF president hian a sawi. “Heng hi kan tan a tha a ni. Kan insiamthatna atan leh kan inzir finna atan kan tla thin hi a tha,” a ti.
Mizoramah political party 30 chuang a lo ding tawh a. Tun thlenga hnam party la ding awmchhun chu MNF chiah an ni tih a sawi. Mizo Union leh PC chu ral thei lo tura mawiin an chak em em a. Mahse, an awm tawh lo tih sawiin, MNF erawh kum 64 Pathianin a hruai ta a, an chak zual zel tih a sawi a ni.