David Zochhuanmawia
(Vida Hrahsel Saza)
Mahni inhriatchian hi thil pawimawh tak a ni tiin bul tan phawt ang aw! |ha emaw la inti tlat, tha tawh si lo hi awm theih a ni bawk. Damdawi emaw, eitur emaw, siam chawp chi reng reng pawhin thih (Expire) hun an nei vek a, kumkhaw daih a awm thei lo a ni. Tin, mihring pawhin thih hun, ral hun kan nei vek dawn a. Lei chu leiah, vaivut chu vaivuta kir hun kan nei dawn a, kan kumhlun dawn lo.
Sorkar hnathawk te pawhin Pension hun an nei-
Sorkarin a hnuaia thawkte hnathawh theih hun chhung kum bithliahin, kum 60 an tlinin Superanuation Pension-in an hna an chawlhsan a. Tun hmaa lut hman te tan an dam chhungin upat chawlh hlawh tlêm zawk an la reng thei a. Tun hnua sorkar hnathawka lut tan erawh GP Fund an lo khawl ve bak chhuah pui an nei tawh lem lo a. Upat chawlh hlawh pawh an la thei tawh lo a ni. Bible-a kan hmuh angin mihring dam hun chhung chu kum 70 a ni a, chakna avangin kum 80 a ni thei, tih a ni a. Rilru ngaihtuahnaah tling (fit) la inti viau mah ila engkimah duh tawk hun, midang ken hun kan insiam thiam a tha hlê a ni.
Chawlh hlân ka nghakhlel-
Khawvela kan awm chhungin faisa rin ngawt hi a theih hauh lo a. Genesis ziaka kan hmuh angin, thuthlung hluiah chuan Pathianin a mite min hrem nan mipa chuan rim taka hnathawk a, ei hmu turin min ti a. Hmeichhia erawhin hrehawm taka nau vei a, nei turin anchhia a lawh bawk a nih kha! Ka sawi duh lai tak zawk chu rim tak leh taima taka thawh hi a ni. Kut tling takin sum la lut ila, dikna leh rinawmna nen nung tûra ke kan pên zel a tul bawk. Pathian lawm tlâka nung thin te’n Pathian hnena chawlh hlân an lo nghakhlel thin a lo ni a. Khawvela inham buai hi an châk tawh dêr lo. Mahse, Pathian min dah chhan vang zawkin a mite chuan Pathian rawngbawlin theih tawp an la chhuah zel zawk a, an thawhrim rah sengin an la chawl hahdam dawn a ni.
Politics-ah kum bithliah a awm lo-
Politics nawm ve na chu mahni inhmuh thatna mual a ni ve thung hi a ni. Sorkar hnathawk upat chawlh hmanga (Pension) tawhte pawh Politics-ah zuang lûtin, upa an la inti lo hlê thin a. Ram leh hnam tan an nun, an hun an la hlân talh talh duh zawk a ni. Politics-ah chuan midang dinhmun tha se tih lam a lang meuh lo a. “Khawi, khawi, khawi…” “Kei, kei, kei…” tihna mual a ni a. Huaisen pawh a ngai thin khawp mai. ‘Kei chu ka lo âwl ang e,’ tih ai chuan, “Candidate ka nih loh chuan pâwl ka ti buai ang,” tih rilru pu rual thah an ni, an ti thin a. Politician te hi kan hmu hê a, rilru tha lo (Piangthar lo) ah kan ngai tlangpui thin a nih kha. Tunah chuan a dang chho hret hret a. Politician dawt sawi chingte dawt sawi haichhuah a awlsam tawh êm êm a. Kum bithliah chin awm lo ta chu MLA atan pawh, “India khua leh tui, mi ang a ni tûr a ni,” tih a ni tawp mai a. Kum tam tawhte pawh phur takin kan la tei suau suau a nih hi. Kan thalai thluak tha leh chak zawkte hi engtikah nge kan hûn chhuah ve angt
Ka lo chawl ve tawh ang e-
Mizorama sorkarna siam tawh zinga Chief Minister ni rei ber, Dr. Lal Thanhawla’n, “Hetiang a nih chuan chawlh hahdam hi ka mamawh tawh a, ka tu leh fate pawhin chawl tur hian min ngên nasa a. Zin khaw thawngin ka tu leh fate nen hun hlimawm takte kan hman ho theih phah a, ka lawm ta veng veng zawk a ni,” a ti a. An kum pawh a lo tam ve tawh a, a rilru fit mah se a taksa lam a fit tha tawh lo tih a inchiang ve ta niin a lang a. Fak a phûin, “ka lo chawl ve tawh ang e,” a tihna hian Mizoram tan tun aia sorkar tha zawk her chhuahna kawng a sial ngei dawn niin a lang. Tin, eng Party pawh nise, Ex-MLA lo ni tawh te, Ex-Minister lo ni tawhte pawhin mahni dinhmun inchiang chungin ruahmanna siam se la; Mizoram tana tha zawk tûr a nih dawn phawt chuan, “Ka lo chawl ve tawh ang e,” tihna thinlung nen thalai zawkte ken nachâng hre thar zel se a tha ngawt mai.
A Tlipna-
Party chhungah Politician Senior atanga thalai inchawih tawk a tul thin a. A bikin MLA Candidate tûrin inchawih mâwi tak a tul lehzual ang. |halai rual tan an kal sual tûr venpuitu Senior an awm a ngai a. Tin, thalai aia Senior an tam chuan thu a tam a, hmalakna a chak lo ve leh thei thung bawk. Chutiang taka kalpui thiam Party te hi kum 2023 MLA General Election-ah hian an ding chang mai dawn niin a lang a. Party thenkhat, beiseina la nei sâng takte pawh hi an hruaitu lû te’n, “Ka lo chawl ve tawh ang e,” an ti lo a nih hlauh chuan Party ang pawha dinchhuah leh ngaihna awm tawh lo tûrte an ni hlawmin a rinawm tho bawk a ni.