Kabul bomb puak mi pasarih thihna tituah ISIL inchhal

ISIL (ISIS) chuan Afghanistan khawpui thingpui dawra bomb puaka mi pasarih thihna thleng chu an tih a nih thu an sawi.
Thawhtanni zan tlai tawh takah khan anmahni enkawl, Aamaq news agency-ah Chinese mite enkawl thingpui dawrah hian thihchilhtu lutin a chhungah a bomb pai chu a tipuak niin an tar lang.
ISIL-in thu an chhuahah hian Taliban vengtute telin mi 25 thu leh hliam an awm niin an tar lang a, an chetna chu ‘Chinese sorkarin Uighur mite laka pawi a khawihna’ nen inzawm leh an rama Chinese-te chu an la beih zel tur thu an tar lang tel.
Hetih lai hian interior ministry thupuangtu, Mufti Abdul Mateen Qani-a chuan Thawhlehni khan Kabul-a sumdawnna hmun lun lai, Shahr-e-Naw-a Chinese Noodle restaurant-a thil puak hi ‘a chhan an la hre lo va, chhui mek a ni’ tih a sawi thung.
Police thupuangtu, Khalid Zadran-a chuan thil puakah hian Chinese mi, Ayub-a leh Afghan paruk an thi niin a sawi.
Thingpui dawr hi Chinese Muslim tamna laia awm niin Chinese Muslim, Abdul Majid, a nupui leh an Afghan kawppui, Abdul Jabbar Mahmood te enkawl niin Zadran-a chuan a sawi.
Chinese foreign affairs ministry thupuangtu, Guo Jiakun-a chuan Chinese pangain hiam an tuar nia sawiin Afghanistan chu hliam tuarte ‘tha taka enkawl turin’ an phut a, an khua leh tui leh an sorkarin hna a thawhte himna tha tawk pe turin an chah bawk tih a sawi.
China hian Afghanistan hi km 76-a thui riin Taliban sorkar nen hian an intitha hle a, kum 2021-a thuneihna an chan leh hnuah Chinese sumdawngte pawhin an tlawh nasa hle a ni.
Beijing hian mihring dikna chanvo humhalhtu pawlten Uighur, a tam ber Muslim-te tiduhdah anga an puhna chu an pha nasa hle thin a. Uighur-te hi China-ah hian maktaduai 10 chuang awmin chhimthlang lama Xinjiang-ah an awm deuh ber.
Taliban hian himna tiam mah se bomb hmanga inbeihna hi Afghanistan-ah hian a la thleng reng a, a tam ber hi ISIL leh a kaihhnawih pawlten an tihah an chhal thin.