Prabhas, Amitabh Bachchan, Deepika Padukone leh Kamal Hassan te channa ‘Kalki 2898 AD’ chuan ni 14 chhungin India-a cinema hall ticket hralhna atangin cheng vaibelchhe 536.75 a la lut tling ta a, khawvel huapin cheng vaibelchhe 900 a pel ta bawk.
Kalki 2898 AD sum lak luh hi Telegu version atangin a tam ber a, cheng vaibelchhe 252.1 a tling a, Hindi version-in dawtin, cheng vaibelchhe 229.05 a tling tawh a, Tamil atangin cheng vaibelchhe 31.55, Malayalam atangin cheng vaibelchhe 19.65 leh Kannada atangin cheng vaibelchhe 4.4 a tling tawh.
2023-a Hindi film hit zet mai Ranbir Kapoor channa ‘Animal’ khan khawvel huapin cinema hall ticket hralhna atangin cheng vaibelchhe 915 a la lut thei a, hei hi Kalki 2898 AD hian a pel tawh a, tun weekend hi a zawh leh meuh chuan Kalki 2898 AD sum lak luh hian cheng vaibelchhe 1,000 a pel thei tawh dawn niin an chhut a, nikuma Hindi film tlangzarh hit tak tak, Shah Rukh Khan channa ve ve Jawan (cheng vaibelchhe 1,160) leh Pathaan (cheng vaibelchhe 1055) te pawh a khum dawn niin an chhut.
Indian film zinga cinema hall ticket hralhna atanga sum la lut hnem ber chu Baahubali 2 kha niin, 2017 khan cheng vaibelchhe 1,788 a la lut thei a, he film pawh hi Prabhas channa tho a ni. Amitabh leh Kamal Hassan te tan chuan ‘Kalki 2898 AD’ hi an film channa sum la lut hnem ber a la ni ve thung.
Hetihrual hian Kalki kalkawng hi a mam purh tawh dawn bik lo a nih hmel a, Kamal Hassan channa ‘Indian 2’ an tlangzarh dawn a, tun weekend-ah competition a sang dawn riau a, a bik takin India chhim market-ah an innêk na dawn a, hetihrual hian Hindi film lamah pawh Akshay Kumar channa ‘Sarfira’ an tlangzarh dawn bawk a, hei hian Kalki Hindi market a rawn bawh buai ve tawh dawn bawk.
Kalki 2898 AD hi a sum lak luh a tha bawk a a film chhunzawmna tur pawh an buaipui leh mup mup tawh a, film director Nag Ashwin chuan Kalki 2898 AD chhunzawm tur hi ni 25 vel shooting an kalpui leh tawh niin a sawi.
Kalki 2898 AD-in vbc 900 la lut tawh
