Kalphung thar a sawia sawi nilo a taka tih a pawimawh – Lalsawta

Kalphung thar chu a sawia sawi niloin a taka tih a pawimawh zawk tih Congress president Lalsawta chuan a sawi.
Hrangturzo West MPCC Block Conference Khawlailunga neih a hmanpuinaah Lalsawta chuan ZPM-in kalphung thar an tih fo chu a sawia sawi ai chuan a taka tih a pawimawh zawk tih sawiin, amah pawh mi hriat hlawh lo tak an party president atan Lal Thanhawla’n a ruat ta chu kalphung thar a ni tih a sawi.
Kumin MLA inthlanah sawrkar satliah niloin sawrkar tha siam ngei an tum tih sawiin, candidate hausa ringawt thlang loin, mi dik leh mi rinawm, ram leh hnam tana a tha ber ber an vawrh chhuak dawn tih a sawi. Campaign-na tura cheng nuai 200, nuai 300 ka nei tawh ti ho chu Mizoramin a mamawh loh avangin ti beidawng a, hnawl ngam turin mipui a sawm tih a sawi bawk.
Congress party chuan mi taima hlawhtlinna atan sum an dah dawn tih MPCC hruaitu hian a sawi a. Phai atanga chawhmeh rawn lutte chu an enfiah anga, intodelh dan tur an zawng dawn tih a sawi. Tang tak takte an puih tur thu sawiin ramin hma a sawn phah dawn tih a sawi a ni.