David Zochhuanmawia
(Vida Hrahsel Saza)
Mizoram sorkara Home Minister ni mêk Pu K. Sapdanga, Aizawl North-III Bialtu MLA ni bawk chuan Vairengte Police pahnih S.I leh A.S.I a suspend a. OC leh Constable 6 a transfer tih an sorkar tirah kan hmu nghal a. Thil dik lo titu chhui an la nih dawn avangin thil ti dik lotu nia rinhlelh pahnih a suspend a, an hna atanga bân erawh an ni lo. An chhui ang a, Court an thlenpui a rinawm a. An thlenpui lo a nih pawhin an dik a nih chuan Court-in thiam a chantir ang a, an hna ngai an zawm leh thei ang. Lo dik lo ta se sorkar hnathawk nghet ni si hian engtikah emaw chuan an hna an zawm leh tho a rinawm.
Home Minister tharin thil dik lo titute chunga thuneihna a lekkawh ngam hi a fakawm thlawt a ni.
Vairengte Police check Gate-a duty te’n motor lian bungraw phur luh chu check lem lovin dân ni lo hmangin pawisa an dah/chawi tir a, an tlang tir mai thin niawm tak a ni. He thil hi engtik atanga thleng tak ni ang maw? Police te hi an Training zawhin ‘Rinawmna’ thutiam tira lakluh an ni thin a. An intiam anga an rinawm thei lo anih chuan mahni inbân ngam khawpa huaisen zawk tur an niin a lang. Pathian thu tak pawhin Kristian tan rinawmna tel lo chuan vanram a kai theih âwm si lo a!
Mizoram Police zawng zawng an rinawm lo tihna a kawk lova. Police hnathawk lai tam tak kan neih zingah mi tlemte an rinawm lo thin chauh niin a lang. He rinawm lohna pian chhuahna hi tu atanga intan nge ni ang? Police emaw, Excise emaw hian ramri dep hmun hrang hranga Duty hi an hlawkpui viau niin a lang a. Engkimah mahni tana hlawk tum ngawt ni lo. Ram leh Hnam himna tur tak tak ngaihtuah a, mi piangthar tha te awm (duty) na tûr niawm tak a ni.
Kalphung tharah dân lova chê an hrem zel a. Hetiang renga an kal a, dik leh rinawm taka an hotu lawkte an che ngam zel anih chuan Pathianin mal a sawm zel ang a. Hun lo kal tur kum 2028 MLA inthlanah pawh mi nawlpuiin kan la duh zel a rinawm. Mahse, tih that tum luatah an daipelh fo a nih erawh chuan mipuiin a tawk tih chin an nei vein a rinawm thung a. Tun dinhmunah an tihsual lian tham sawi tur a la awm lova, an kal ngai anga dik taka an kal zel a nih chuan Party tlahniam mêk dangte êr phak an nih loh zel a rinawm.