US Vice-President Kamal Harris chuan Gaza-a mipuite chu an ‘tam’ tawh tia sawiin Israel chu ‘tanpuina tam zawk a luh remti turin’ a tur a.
Harris chuan “Kar ruk chhung tal awh inkahhaina a awm nghal ngei tur a ni,” tia sawiin “chutih chhung chuan Israel mitang te chhuah ni bawk rawh se,” tiin a sawi bawk.
A hmain Israel chuan Egypt-a inkahhai awm theih nana inbiaknaah a tel duh lo va, a chhan berah pawh Hamas te chuan an mitang nung dama la awm list a pe duh lo tiin a sawi.
Hamas te thung chuan mi engzah nge an hren mek zinga la dam an sawi theih lohna chhan chu Israel-in a bomb zui zel vang, an ti ve thung.
“Tu te nge la dam hriat vek theih a ni lo” tiin Dr Basem Naim, senior Hamas official chuan a sawi a.
Hamas team leh mediators te US leh Qatar a mi te chu Egypt capital Cairo ah inkahhai a awm theih nana hma la zui zel turin an awm tia sawi a ni bawk.
Hetih lai hian kar kalta Ningani-a Gaza City-a Palestinian mipui ten aid convoy an bawr nasat lutuk avanga Israel sipaite silai hmeh puah avanga mi 112 chuangin nunna an chan phah hnuah Israel nawrna a nasa zual hle a.
Harris chuan, “Nitina Gaza a kan hmuh chu chhiatna a ni. Chhungkaw thenkhat ten thing hnah te leh ran chaw te an ei tawh tih report kan hria a, hmeichhia ten nau pianken tha lo tak te medical care awm lovin an hring a, naupang te eitur tlakchham leh hriselna chhe lutukin an thi bawk” tiin a sawi a, “|um tam ka sawi tawh angin Palestinian pawisawi lo nunna chan an tam lutuk tawh” tiin a sawi bawk.
Vice-president chuan mihring kan nih anga inpui tawn tur kan nih angin kan che lo thei lo a ni tia sawi zui bawkin harris hian Thawhtanni khan Israel war cabinet member thiltithei tak Benny Gantz nen Washington ah inbiakna an nei bawk a. Inkahhai awm theihna tur leh Gaza a humanitarian aid pekluh dan tur an sawiho ber dawn tia sawi a ni.
Harris chuan, “Inkahhai a awm theih nan ruahmanna a awm a, Hamas te pawhin chu chu an pawm a ngai. Inkahhai a awm a ngai a ni. Mitang te pawh an chhungte hnen thleng se la, Gaza mipui te pawh chhawmdawl ang u” a ti bawk a.
Harris chuan “Israeli sorkar chuan tanpuina tam zawk a luh a rem ti tur a ni a, chhuanlam a awm tur a ni lo” tiin a sawi bawk.
A hmain Dr Basem Naim, Hamas political bureau member chuan Hamas te chuan Israel mitang an neih te chu engzah nge la dam an sawi thei mai lo a ti a.
“Israel-in min bomb reng a, kawngpui a dang chat bawk a, mitang te hmun hrang hranga dah an ni a, engzah nge la dam hriat theih a ni lo,” tiin a sawi a.
“Data kan lakkhawm theih nan inkahhai awm se kan ti reng a ni. Intiamkamna erawh kan pawm thei lo,” tiin a sawi.
US, UK leh Western partners te chuan Iranian thlawp Hamas te chu terrorists organisation tia an puan a ni a.
“Hamas te hi terrorist organisation nunrawng tak an ni a, Israel che thei lova siam a nih hma chuan October 7 a thil thleng ang kha an thlentir zui zel ang. Hamas te hian pawisawi lo nunna engahmah an ngai lo” tiin Kamala Harris chuan a sawi a, “Hamas ten Gaza an thunun tur a ni lo” a ti bawk.
Kamala Harris-i’n Israel sorkar nawr zel
