Kan chenna in theuh fate tana ‘home’ ni tura tan kan lak a tul – CYMA vice president

Nu leh paten kan chenna in theuh kan fate tan ‘home’ ni tura tan lak thar a ngai tih Central YMA hruaitu Prof Lalnuntluanga chuan a sawi.
YMA kumpuan – ‘Ruihhlo Do’ chu YMA branch hrang hrangin an hawng zel a. Thawhlehni zana kumpuan hawngtu zingah YMA Salem Veng Branch telin, hmanpuitu Central YMA vice president Prof Lalnuntluanga chuan, ruihhloin mimal, chhungkua, khawtlang min tih buai dan sawi leh min tih chhiat mek dan a sawi a. Tih tak taka do a tul zia sawiin, “Chhungkuaah bul kan tan that a, nu leh paten kan chenna in theuh fate tan ‘home’ ni tura tan kan lak thar a. Pawl leh kohhranten thapui thawha ka do a ngai tawh,” a ti.
YMA Chawlhhmun Branch kumpuan hawn hmanpuitu Central YMA general secretary Prof. Malsawmliana chuan, ruihhlo hluar avangin khawtlang nunah pipu nun mawi tlawmngaihna leh inlainat tawnna a tlakhniam phah tiin, ruihhlo zuarte pawh khawtlang tan mi hnawk an lo ni ta tih a sawi.
“YMA hian khawtlang nun siamthat leh Zofate hmasawnna ngaihtuah hi kan hnapui a nih angin ram nuam leh him, khawtlang nun nuam kan neih theihnan khawtlanga sual chi hrang hrang do tlan a ngai a. Ruihhlo tello khawtlang nun nuam siam turin tangrual ang u,” a ti.
YMA Lungverh Branch kumpuan hawn hmanpuitu Central YMA asst secretary SF David Ngursangzuala chuan, YMA chu politics rawngkai lo a ni a. Politics-a an inhmang a nih pawhin YMA chhunga lakluh a rem lo, tiin, AMC inthlan turah pawh YMA-in ‘colour’ an tih lan loh a tul tih a sawi.
Khawvela ram ropui USA meuh pawh hman atangin ruihhlo in tibuai mah se, tlawm loin vawiin thlengin an la doa, Mizorampawh ruihhlo in min chiah nasa mah se, kan tlawm thei loa, kan zam tur a ni loa, kan tang sauh sauh tur a ni, tiin a sawi.
Zampuimanga Group YMA Rorel inkhawm leh Ruihhlo Do kumpuan hmanpuitu Central YMA treasurer Er H Duhkima chuan, ruihhlo in kan ram min tichhiat nasat tawh avangin Ruihhlo Do an puang tih a sawi. “Thalai min venghimtu tur, min chawmtu tur Home-ah kan chawm hlawmin an awm ta nghek nghek mai hmuh hian ruihhlo hi do loh theih loh a ni. Ruihhlo ti tur ven leh ti mek chhanchhuak turin ke pen chhuak turin ka sawm che u a ni,” a ti.