Darthakunga
Ramhlun Venglai
Hmanni chu ka office bang Zarkawta helmet dawr pakhatah ka helmet hmai ka thlak tir a. E khai, a man pek belh chakawm khawpin zuk danglam a maw le. A hlui kha a lo rang deuh tawh a, khawchhiat leh khaw dur ni leh tiauchhum awm chang chuan a fiah vak tawh lo a, a thar ka han khum chiah mai kha chu engmah awm lo ang maiin a fiah tha a. Ka thlak lo ang tih ka hlau a, ka lo va thlak har zawk ve aw tiin kei leh kei ka indem zui ta hial a. Retreat azawnga retreat fuh ber a ni hial ang.
Kan hriat theuh angin TBCC chanchinin zoram khawvel a deng chhuak a. Youtuber-te chaw tui a tling hial awm e. Hemi chungchanga ka rilrua lo awm ve chu TBCC neitu Pu Zohminga leh a thawktute leh Board te hi an in re-treat ve ang em le tih a ni a. Ka helmet hmai ka thlak fuh anga an inthlak fuh chuan mi tam tak tan malsawmna an ni leh ngei ang.
Engti zawngin nge an in re-treat ang a, hmasawnna kan hmuh ang aw tih chu hriat chakawm hle mah se tun thut thuta hriat theih pawh a ni dawn lova. Media lamah Pu Zohminga chuan mi 500 vel bak an enkawl tawh dawn loh thu leh Firm and Society, Govt of Mizorama an in register tur thu a sawi kha mipui hriata an in re-treat dan tur tharlam ber a nih hmel a, hmasawnna tha tak chu a ni phawt e. Mahse, number tih tlem ai chuan thawktu quality leh thawktu rilru put hmang leh infrastructure lama an in re-treat hi a pawimawh ber zawk chu a nih hmel.
Ruihhlo ngawlveina (Drugs Addiction) leh sual inkungkaihna hi a thuk hle mai a. Phur thuta enkawl dam chi an ni lo. Eng emaw mawlhtu neihna atanga zuam chi ngawt pawh a ni lo. Inkaihhruaina tha tak hnuaia mi thiamte enkawlna mamawh bik an nih avangin Ruatfela Nu-in vawiina addict, naktuka Counsellor a tihte kuta dah ngawt chi a lo. WHO (World Health Organisation) phei chuan Ngawlveina hi natna benvawn a ti hial a ni. Natna benvawn chu natna tihdam theih loh tihna a ni a. Sawi thui lo mai ila. Natna benvawn kan hriat tlanglawn ber chu zunthlum hi a ni. Zunthlum leh ngawlveina hian inanna an nei thuk khawp mai.
TBCC rawngbawlna ropui em em hi chuti teh thuta tawp mai atan chuan a uiawm hle a. Kalpui chhunzawm zel atan pawh a duhawm. Chutih rualin tute committee-in “ngun takin kan ngaihtuah a, kan kal dan pangngai hi tha kan ti” tiha a pangngai anga kal leh erawh chu a chi tawh lova, in re-treat ngei ngei a ngai. A hmaa an kal dan atanga 80-90% vel tala an in re-treat hial pawh a ngaih hmel. Tin, Nu leh pa an ni emaw, tlawmngai pawl an ni emaw, kohhran lam an ni emaw, a dahtu chu tu pawh ni se ngun taka ngaihtuah a, khawlai atanga in thawn luh (refer) mai mai kha a chi loh tih pawh kan hriat a tha awm e.
TBCC chauh ni lovin, Home/Center hrim hrim hi nungchang siam thatna hmun ni mah se a tawpkhawk tak takah loh chuan tu mahin kan tu leh fate kan nawr liam mai mai tur a ni lo. Ruihhlo avanga harsatna neiin insiam that a duha a nu leh pate hnenah Home/Center-ah min dah mai rawh u tia a ngen a nih pawhin a nungchang ngun taka zir phawta chumi hnuah chauh Home-a dah tura thuthlukna siam tur a ni. A tana tha ber kha ngaihtuah hmasak a ngai a ni. Zu avanga harsatna tawk tlangval pakhat chu a nu leh pa ten a duh loh chung Home pakhatah an dah a, Home chhungah chuan ruihhlo a lut ru thin a, zu in tur a awm si lo, a hmuh chhun No 4-a inchiu a chin phah a. Midang hman hlui hriau a hman thin avangin Home a chhuahsan hnuah a thisen test a ni a, HIV leh Syphilis a lo positive hman der. A tana tha tura an ngaihna hmun Home-ah khan Zu a nghei lo mai ni lovin No 4 a addict phah a, HIV leh natna dang a kai phah hlauh zawk a nih chu.
Mizo Kristian zingah hian ruihhlo ngawlvei (Zu pawh tiamin) te dinhmun hi a tha lo em em a. Hei leh chen ruihhloin min tihbuai hnu pawh hian a enkawlna lamah hma kan la sawn hleithei lova. Mi tam tak hi chuan natna benvawn vei, harsatna tawk, chhanchhuah ngai, midang tanpuina mamawh lam hawi zawnga hmuh ai chuan misual hmuhin kan hmu lian zawk a. Thu inhmuh loh apiangin Home emaw Center emaw lama thawn liam kan tum zel emaw tih mai tur a ni. A chung lama kan sawi tawh angin Home/Center hi chu a tawpkhawk atan chauh a ni tih hi i hre thar leh ang u. Khawm case kan tih ang phei hi chu a tih a tih chi loh tawp a ni. Duh loh chunga Camping-a nawr luh hian rah tha a chhuah mawh hle a, a hlawhtlinna rate pawh a sang thei meuh lo. Camping chhuah tlaia kawngkapuia pen luh rual ruala mutbu chhuata paih paha ‘ka tih reng kha’ ti ang chauh kan ni.
Mizoramah hian No. 4 (Heroin) ngawlvei hi 15000 velah chhut ila. Hetia han en mai chuan a tam hle a. Mahse, han sem sawm ta ila. Kohhran, YMA leh MHIP te hian mahni mi leh sa theuh te insem ila chuan a tlem khawp ang. Kohhran member tamnaah chuan an lo tam deuh pawh ni se 40/50 han pel chu an tam lo khawp ang. Kan tlawmngai pawl YMA te MHIP te hian Kohhran hi thawhpui thiam se. Kohhran chuan sum a nei a, ruihhlo ngaite pual tan hian han her rem leh deuh se. Sorkar puihna tel hauh lo pawhin mahni mi leh sa theuh te hi kum 10 vel tha thlah lovin thiamna bik neite ruaiin han kalpui mup mup mai se la chuan hmuh theihin hma kan sawn ngei ang.
Kohhran kan sawi rual ruala rilrua lo lang leh chu Mizoram State AIDS Control Society (MSACS) leh Mizoram Social Defence and Rehabilitation Board (MSD&RB), Social Welfare Department, Govt. of Mizoram te hi an ni. Heng department/pawl pahnihte hi Ruihhlo kaihhnawihah chuan tha thawh hlawk ber an ni hial ang. Anni hian Kohhran leh khawtlang hi tun aia chak leh thuk zawk hian thawhpui thei se. Kohhran kalphung mil deuhin ruahmanna te hi duang ta se. Anni hian technical support pein Kohhran chuan hmunhma leh sum leh pai lamah lo do let ve bawk se. State dang awh khawpin hma kan sawn ngei ang. MSACS thawhpui Kohhran thenkhat Satellite OST kalpui mekte reng hian hma an sawn em mai.
Heti tak maia kan thalai ten ruihhlo an ti nasa mai hi i vei thar mawlh teh ang u. TBCC lam pawh an in re-treat mek a. Home/Center dangte pawh lo in re-treat ve mek bawk se. Thawktute pawh thiamna bik neite chauh ruai ila. Sorkar-in dan a siam (Minimum Standard) te hi zawm hram hram tum ila. Ruihhloa sumdawngte pawh tha thlah hauh lovin thuneitu lamin lo bawhzui bawk se. Hma kan sawn ngei ang. Chutiang tur chuan i in re-treat zel ang u.