Kan inrenchem hle dawn
– ZPM leader
Sawrkarin leiba a ngah avangin an party an sawrkar a nih chuan an inrenchem hle dawn tih ZPM chief minicterial candidate Lalduhoma chuan a sawi.
Champhai district East Tuipui bial khua a tlawhkualnaah ZPM leader Lalduhoma chuan, state-in leiba a ngah avangin sawrkarna an chang a nih chuan an inrenchem a ngai hle dawn a, a hautak lo thei ang bera an inrelbawl a ngai tih a sawi.
Lok Ayukta an thuamchak anga, hna thawk theiin an siam dawn, tia sawiin, “Chumi chuan rang takin eirukna a tih reh pawh kan beisei. Sawrkar atanga hamthatna dawn tur a awmin a phu leh mamawh tak takten an hmu mai dawn a. Party mi leh sa induhsakna hmanga inpek kan duh ve lo. Mahni party mi an nih loh avanga mirethei pawh nise, ensan an ni thin hi tihtawp kan duh a. Economic nationalism kan ngaipawimawh a, kan rama khuanu dah sa awm ang angte kan ngaipawimawh dawn,” a ti.
ZPM chuan party dangte tih dan ang niloin, collective leadership an kalpui a. Chief minister leh party president nih kawp a rem ve lo tih Lalduhoma hian a sawi a. Chief minister-in works department a chang ve dawn loa, department dang zawng zawng a vil dawn a, a chak lo a dawmkang anga, enpui ngai a enpui zel dawn tih a sawi a ni.
Kan inrenchem hle dawn – ZPM leader
