Lalchhandama Colney
Ph – 9862982321
Chanchinbu, Radio,T.V.,etc., atangtein kan hre thin ang, sap ramah pawh khua a lum hle, 40-48 degree celcius te a ni, tih te. Vai ram khaw lum zawng te pawh 40 degree celcius chung lam nih chang te pawh an nei hawlh hlawm. Chutih laiin US-ah vur thli a tleh, mi chuti zat chu an thi, chhiatna nasa ber a la ni ang, tih te. Kan hriat theuh angin ram nuam tak kan tih thin angah te pawh sik leh sa inthlak danglam nasat avangin, harsatna, buaina, nasa tak an tawk ta zauh zauh a ni. Keini pawh hi tun hma lam ngaihtuah chuan kan sik leh sa hi a inthlau ve ta deuh, khawpui boruak pawh a thianghlim vak tawh lo. Vai ram kan han tih mai ho hi chu a tlangpui thuin ram lum a ni sa ve hrim hrim a, sap ram angah te chuan thilsiamna lamah an thang nasa, chu chuan ramngaw tam tak a luahlan a, an tichereu nasa, sik leh sa lamin a tuar leh si a, la hriat ngai em em loh khawlum tak te, khawvawt uchuak te, an nei ta zauh zauh ni berin a lang.Aw le, keini pawh kan bang chuang lo, hmasawnpui nana hmang chuang bawk si lovin kan awm ve mek ni berin a hriat.
Sawi tawh angin chanchinthar lam i chhiar emaw thlir emaw in, khaw lum em em ziate, boruak bawlhhlawh lutuk,tih te, ruah sur tam leh lutuk, khawkheng,tih te. Hetih lai hian keini chu a lum ber lai pawhin 34 degree celcius (Aizawl) tih vel te chauh kan la ni a, khawvawt pawh hi 10 degree celcius (Aizawl) vel bawr, a tih theih ang. Ruahtui tlak dan erawh a inang lo leh zauh thin, mahse, a pawi em em phak lovang. A tlangpui thuin ruahtui kan dawng tha a, lei a min duh hle, tih loh chu han buaina em em kum khat chhung hian kan nei mang lo. Ramngawte pawh kan ti chereu nasa hle a, heti chung chung hian hmunawl lai apiangah chuan eng thil emaw ber a to hring dup reng tho. Furah hi chuan heng hnim to del dul hote hi chu ngaimawh vak duh lo ila a tha, tui luang ral tur leh leitha, tin, leimin awlsam lutuk tur ven nan te pawh a tha, chu bakah boruak chhia an hip ral a, boruak thianghlim an pek chhuah ve tho avangin. Heng ang neuh neuh te han ngaihtuah hi chuan, kan va la vannei ve aw, chhantlak kan la awm tlat mai, a tih ve theih a ni.
Assam ramte han thlir chuan a mi cheng tam zawk, dawrkai, sumdawnna hmun dangah te pawh Bengali emaw an ni vek mai, anmahni Assamese, han tih tur hi chu an tam vak lo tlat mai.Meghalaya-ah te pawh a ram neitu Khasi-te chu michhe te te, tlem te chauh an ni deuh ber tawh mai. Nikuma Manipur tualchhung buaina rapthlak takte pawh kha, a bul ber chu neitu nih inchuhna,chi leh chi inkara thleng a ni. Sawi ta zel ila J&K buaina a tawp theih loh chhan chu hel pawl (Firfiak)te khan ram chhungah lamtang an neih theih zel vang a ni deuh ber mai, an inlungrual lo, Pakistan lam awn kha an awm vet lat thin alawm. Khawvelah hnam tluchhia, mang tawh, engzat nge awm tawh ang aw, hriat theih chinah chuan Juda hnam hian beihna an tawk nasa hle, tih boral vek tumnate pawh a lo awm tawh a ni. Mahse, kan hriat theuh angin hnamah an chiang a, vawiinah chuan khawvela mite entawn leh fak, ram bik(Special)tak an ni reng tawh a ni. Keini, Mizote pawh han inthlir ve ta ila, ram mi cheng 80% lai chu Mizo kan la ni, hnamdangin min la pawlh buai em em lo, retheiin, intodelh lo hle mah ila, hun kan la nei e, ram ropui, changkang ni turin.
Ber-thla kan han thleng chho a, vaiho kan tih mai te hunpui ve puja chi hrang hrang, anni hi zawng a dan a dang deuh, an thil zawrh lai tha tha kha rethei zawk te lei theih ve turin an ti a, a man 30-40% dawn lai ten an han ti hniam a. Keini kha chu a nih loh thin kha, Krismas hun lai chu a rate san lai ber, mite bat nasat lai berin a ni thin. Kan hunpui hmang ve chu a then tan chuan lungngaihna ni/hun, inkhawhral vekna hun a ni thin tlat mai. Awmtheite chuan a ni chuang lova, harsa leh retheite tan chuan a huphurhawm thin hle a nih kha.Nungchate leh kan luidungte enkawl dan leh hmuh dante chu a lo va rapthlak thin em, vawiin thlengin kan la sim hlei thei chuang bawk si lo. Hindu-pa, tlangval ten duat taka an enkawl a, eitur hialte pawh an pek thin laiin, keini chuan silai tha ber ber chi nen kan la veh kan la veh mai chu a nih hi. Kan Kristiannaah hian kan chiang lo, tih hreh lah hi kan nei mang thin bawk si lo. Heti chung chung hian veng pakhatah pawh biak in tam takzia te, kan than ve nasatzia te, chawlhnia kawngpui dung an reh deuh thup mai te, dar an ri a, inkhawm tur kal duah duah te, han thlir chuan, chhungril lam hre lo mah ila, kan la Pathian thu ve viau alawm maw le, a tih theih.
Mizote a tha lo lam zawnga a ber nihna kan ngahzia te kan hre thinin ka ring, hengte hi a dik thin reng a ni. Kan hnam tawng aia sap tawng kan dah san leh ngaihhlut em em dan te han ngaihtuah chuan, kan khaw hawi a lo va la zim em, nikum kum tawp lama kan mithiam neih ve te intelkhawm-Mizo tawng leh Mizo hnam thil, humhalh leh enkawl tura pawl indinte kha, a lawmawmin a ropui viau a, mahse, an pawl hming kha Mizo tawng a ni miah si lo, tih lai vel te ka lo ngaihtuah lai chuan, a va buaithlak ve aw, tawngin a daih leh ta pek lo aniang, tih bak chu han sawi ngaihna vak pawh ka hre bik lo ve. Aw le, eng pawh nise, ram rethei leh intichangkang ve tak hnam kan ni miau a, kan tihawm tak hi kan ti ve thin bawk a nia. Kan han sawi tak te han ngaihtuah let thuak thuak ila, a tha ber chu kan ni lo, mahse, kan la tha ve viau alawm maw le, chhantlak kan la awm e, kan la vannei hle e, i ti mai ang.