Kan lei kan ven that chuan kan party leh state-in kawng dik leh kawng tha a zawh theih a ring tih BJP Mizoram president Vanlalhmuaka chuan a sawi.
Kum 2025 atan BJP Mizoram State office hi Zirtawpni khan hawn a ni a. Thusawitu State president chuan kan ngaihtuahna leh kan thinlunga awm ang anga kan chet chhuah chuan thil a buai viau thei a, kan lei ven that a ngai tih a sawi. “Kan lei kan ven that chuan kan party emaw state emaw hian kawng dik leh kawng tha zawk a zawh anga, politics tak tak ram hmasawnna leh ram thatna ngaihtuah chungin, Kristian state kan nih ang taka ringlo miten Zoramah Kristianna dik tak a thlen a, central emaw kan chhehvela chengte hian kan awmdan an hmua, min thlir reng a ni tih hre chunga hmalam pan a pawimawh. Kan thusawi aiin kan nun hian thu a sawi ring zawk a ni tih hre chungin kum 2025-ah hian hma la ang u,” a ti.
MLA Dr K Beichhua pawhin politics chu tute emaw khelh atan dah mai loin, kohhran mi, Pathian tih mi leh mi tha tak takten kan khelh a ngai, tia sawiin, “Chuti a nih loh chuan kan ram hian kawng dik a zawh thei dawn lo. Mizoram kan hmangaih a nih chuan kohhrana kan mitha leh hmingtha tak takte hian pawnlam atanga min thlir mai loin, BJP-ah lo zuang lut ula, BJP tha kan din anga, Mizoram hian ram hmangaihtu tha a nei mai dawn a ni,” a ti. Mizoram mipuiin thil tak tak kan ngaihtuah a ngai, tiin, “Sum a vang em mai, tihte sumdawngten kan auhla a ni ta. Sum a van chuan a mawhphurtu chu sawrkar a ni a, sawrkar ber a retheih chuan sum lengvak a tlem anga, miretheiten kan tawrh phahin eichawp kan dapna thlengin a tawrh phah thin avangin sawrkar hian sum a neih a ngai,” a ti.
State Core Group member Lalrinliana Sailo chuan Mizorama sawrkar mekin, an sawrkar hmaa sum an puk ve loh tur thu an sawi laiin, kum kal mekah sawrkar hian OMB hmangin cheng vaibelchhe sang tel a puk a ngai ta mai chu a mak hle tih a sawi. “An sawrkar hmaa pawnlam atanga en ang ngawt a nih loh zia pawh tunah chuan an hre ve tawh turah ngai ila, Mizoram hmasawnna tur hian enge pawimawh a, tute nge pawimawh tih kan ngaihtuah tel a ngai. Tun dinhmunah Mizoram hian hmangaihtu tak tak kan neih a ngai a, kan hmalam hun tur ngaihtuahin chhanchhuaktu kan ngai a ni,” a ti. Chumi ah chuan BJP Mizoram-in mawhphurhna a nei tih hria a, kum 2025 hian rilru thar pu a, kan nitin nun uluk lehzual a, Pathian lam thlir chunga hma la turin an infuih tih a sawi a ni.
Kan lei ven that a ngai – MBJP president
