Mizorama cheng mipui chu kan nundan leh hawiherah India rama state ralmuang bera cheng tih atana mawi nise a duh tih larsap Dr Hari Babu Kambhampati chuan a sawi.
Vawiin, Mizoram State Day puala thuchah a siamah larsap chuan, 1986 June 30 khan India sawrkar leh Mizo National Front inkara inremna thuthlung (memorandum of settlement), Mizoram Peace Accord tia hriat chu ziah a ni a. Hemi ni atang hian Mizoram chu state puitlinga hlankai niin, he remna thuthlung hian kum 20 chuang rambuai a rawn titawp a, 1987 February 20 khan Mizoram chuan state puitling angin kawng engkimah bul a tan ta tih a sawi.
“Peace Accord avang hian Mizoram chu sawrkar laipuiin state min pe tih kan hriat a pawimawh hle a. Mizoram pawh hian kan intiamna rinawm taka vawng tlatin, kum 37 chhung chu state ralmuang ber kan ni mek a ni,” a ti.
Sawrkar laipuiin ram hmasawnna atan scheme leh programme hrang hrang a siam zing ami Ek Bharat Shreshtha Bharat chuan state hrang hranga chengte kan inhriatchian theih na turin program tha tak tak a siam a, India rama cheng hnam hrang hrang kan inpawh a, kan inhriatchian tawn leh inlaichinna a ngheh zual zel chu a thil tum pawimawh a ni tih Dr Hari Babu Kambhampati hian a sawi.
Ram chhung hmun hrang hrang atanga lokal India mi kan nih angin, nunphung leh khawsak dan hrang hrang kan nei a. Heng kan ziarang leh khawsak phung danglamna hian min then awi a. India khua leh tui chu mi chi hrang hrang, tih dan phung leh khawsak phung danglam tak nei theuh kan ni tih min hriatchian tir zawk se tha a tih thu a sawi bawk.
“Ek Bharat Shreshtha Bharat tum ang hian, Mizoram mipui zawng zawng kan khawhawi tizau a, midangte khawsak phung hriatthiamsak tum turin kan inchah a. Hei hi kan hnam ziarang hloh loin tih theih a ni. Mizorama kan hnam ziarang hloh chuang loin kan va awmna state-a chengte nundan leh tihdan phung hrethiama zah sak chunga kan khawsak thiam a ngai a. Kan nundan leh hawiher hi India rama state ralmuang bera cheng tih atana mawi a ni tur a ni,” a ti.
Kan nundan hi state ralmuang bera cheng tih atana mawi nise – Dr Hari Babu Kambhampati
