Zoremsangi Pa
Mizorama political party-te hian tha fe fein party an kaihruai vek a, an intlansiakna lamah erawh dawt var hman an hreh lo theuhva, sawrkar kan siam ve hunah chuan tha tak leh ‘ro tlinga tih pawh a tul lem lo’ tuman an ti bik lo; theihtawp an chhuah theuh thin. Chuti chung chuan an leader-te chu finfiah mai theih loh, belhchian dawl mang si lo va inbeih an ching hle bawk a. Mipui min tifing nge min tibuai zawk tih hriat a har ta hle mai. I han x-ray dawn teh ang :-
BJP: Mizorama an din tirh atangin hruaitu tha tak tak an nei zel a, tuna an hotu ve deuh zinga mi chuan ‘President kan neih tawh zingah chuan Pu Hmuaka hi tha ka ti ber mai. Party dang han bei vel atan leh kan party min hruai atan a tha ka ti a, hotu nih tuma lo lutte pawh an che thei der lo’ a ti hmiah mai. An la thang duang fu lo vang tih a sawi theih loh.
Congress: An pu ber Pu Hawla a han chawlh chiah khan an buai ta em em mai a, hotu nih tum an awm ta nual mai a, anmahni ngei pawhin an zep lo. ‘Kan buai riau mai kan pu chawlh hi a hun lo tak zet a ni’, an ti hiala sawi a ni. Party hlun tih takah ti hian hruaitu an insaim thar a an tifuh mai thei; anmahni pawhin hmasawn zawnga kalin an inhria.
MNF: Sawrkar leh inring em em chunga tla an ni a, an tla na hle tih mipui hriat theihin a tal pawl an awm a. Mawh puh tur an zawng a, an party chhungril a nghawng thui hle tih anmahni ngei pawhin an sawi a ni. A tawpah an leader CM ni bawk, Pu Zoramthanga chungah a tla ta ber niin a lang. An Hnam Run a hotu pathum thu te pawh an bang bik lo.
An treasurer Pu Auva hi an sawi dan chuan office kal a taima ber a, mahse sum hailuh lamah a chak tawk lovin an sawi. An minister ten beisei angin an thehlut tha vak lo pawh a ni mai thei.
An vice Pu Zawma hi YMA tawp, he lam atan chuan duhthusam a ni; party hruaitu atan chuan Trailer an tehkhin. An naute sawi dan chuan, ‘sawiselna teh chiam kan hre lo, a ngaihna a hre lo a ni ber mai, party pawh a vei lem lo va, a ngaihtuah peih bawk hek lo, inhmu thiam se chuan elected-a awm ngam tur a ni lo. MP term hnih a chelh chhunga, Parliament-a thu sawi turah a inngai lo emaw ni dawn ni, a ngaihna a hre lem lo a ni ang’, an ti.
An vice bawk Pu Thlenga hi chu sipai bang mah ni se a politician riau a thusawi pawh a thiam, a buluk deuh tih mai loh chu. Thu min hrilh vak a kan thu sawi a ngaithla tawh lem lo an ti thung. Tunah hian OB an inthlang thar a hmapui la mek turah ngai ila, an hma lam hun thlir thiam a har rih.
ZPM hi chu ruling an ni bawk a an la rei loh aiin thu leh hla an ngah tan hlein a lang a i khek rih teh ang.