Kan population hniam lutuk chuan Mizo hnam dinhmun a nghawng nasa dawn nia a hriat thu minister Lalnghinglova Hmar chuan a sawi.
Nilainia Ephraim Higher Secondary School HSLC leh HSSLC 2026 exam-a hlawhtlingte lawmpuina a hmanpuinaah Youth Services minister Lalnghinglova Hmar chuan, India rama nau piang zat fertility rate chu 2.1 a nih laiin, Mizoram chu 1.87 chauh a ni a; India ram mipui zawng zawng za zela chhutin Mizoram population chu 0.09% a ni a, kan population hniam lutuk hian Mizo hnam dinhmun a nghawng nasa dawn nia a hriat thu a sawi a. Hemi kawngah hian tunlai thangtharten rilru thar put a tul hle tih a sawi a ni.
Zo nun zemawi – aia upa zah thiam chu vawngnung zel turin zirlaite a fuih a. Khawi hmunah pawh kal se, an thinlungah pipu chena kan rohlu – zo nun zemawi, aia upa zahna leh midangte nena inzahtawnna vawngnung reng turin a chah.
Ephraim HSS hian kumin HSLC-ah zirlai 163 exam an neih an hlawhtling vek a, English subject topper Joanna Lalzuimawii an nei. HSSLC Arts stream-ah zirlai 99 an exam a, an hlawhtling vek a ni.
Kan punna hniam lutuk hian Mizo hnam a nghawng dawn – Lalnghinglova Hmar
