- Dr K Beichhua
Kan ram hi chapo thei
dinhmunah kan ding lo
- Dr K Beichhua
Engkima kan intodelh loh zia thlir chuan kan ram chu chapo thei dinhmunah kan ding lo tih BJP hruaitu Dr K Beichhua chuan a sawi.
Zirtawpnia an party office-a inkhawmah BJP Mizoram president Dr K Beichhua, MLA chuan, an goal tur chu Mizoram development a ni a, chu development an khawih theihna tur chuan 2028 MLA inthlanah an sawrkar a ngai a, sawrkar turin theihtawp chhuahin hma an la dawn tih a sawi.
“Eng vanga Mizoram hi develop tur nge kan nih kan tih chuan, kan develop loh vanga develop tur kan ni. Vawiinah hian eng dinhmunah nge kan awm kan tih chuan, kan state economy dinhmun kan thlir a, state dangte chuan khutah min en a, min en angin khutah kan awm bawk. Ei leh barah kan intodelh loa, kan intodelh loh zia hi a hretute kan ni a, kawng tinrengah kan intodelh lo. Chutih rual chuan kan rilru erawh chapo tak a ni lawi si,” a ti.
BJP chu an politics kalkawngah chapo taka an awm loh a ngai, tiin, politics-ah reng reng a luang sang apiangin fintu an nei loa, lui tui angin a luanna hniam apiangin fintu an ngah a, a fintu a tam khan lui lianah a lo chang thin tih BJP State president hian a sawi.
Politics chu football ang a ni a, pet goal turin goal bula an lo awm fuh a ngai tih sawiin, “Mizoram mamawh pet chhuak turin Mizoram atanga pet chuan goal ala hlat deuh avangin a har hle. Keini erawh central-a sawrkar party niin, goal bulah kan awm a, goal mouth-a lo pet goal a har dawn lo,” BJP MLA hian a ti a. Mizoram-in development atana mamawh hrang hrang kan hmuha kan neih theihnan mipui tang tlang turin a sawm tih a sawi a ni.