India rama Kristian sakhaw dinhmun tur ngaihtuah thleng phak politics kan ngaihven a tul tih Karnataka-a Kristian minister KJ George chuan a sawi.
Mizoram MLA inthlanpui neih tura Congress party tana rawn campaign, Karnataka sawrkara cabinet minister KJ George hian Inrinni khan Congress Working Committee member Lal Thanhawla chu a chenna inah tlawhin an inkawm.
Minister KJ George chuan India ramah Kristian-te nekchepin kan awm nasa a. Hei hi Pathianin a ram zauh tura min nawrna leh nasa zawka tan la tura min kohna a ni, tiin, Mizoram chu India rama Kristian state awmchhun a ni chu BJP-in thiah vek tumin tan a la a, Manipur-a Kristian-te chunga tawrhna hian hei hi a tichiang tih a sawi a ni
Mizoram chu a Kristian puite a hlawma an awmna a ni a, India rama Kristian sakhaw dinhmun tur ngaihtuah thleng phak politics ngaihven a tul tih KJ George hian sawiin, “Kan sakhua a him loh chuan kan hnam a him loa, kan ram a him ngai loang. Congress sawrkarna hmunah Kristian-te tunah zalen takin chanchintha an hril thei a. India ramah Pathianin a chanchintha hril turin hna min thawh sak a. Karnataka state-ah hneh takin Congress min sawrkar tir,” a ti.
Karnataka-a Congress a sawrkar hlimah Anti-Conversation Law an thiat a. Tunah phei chuan Kristian Development Corporation din turin ruahmanna an siam a, hemi atan hian cheng vaibelchhe 100 an dah hrang a. Hei hian Congress party hi sakhaw zalenna kengtu a ni tih a nemnghet chiang tih a sawi.
Mizorama Congress sawrkar lai khan KJ George hi AICC general secretary in-charge Mizoram a lo ni tawh thin a ni.
Kan sakhaw dinhmun thleng phak politics ngaihven a tul – KJ George
