Kan sakhua humhimna turin Congress hi kawng awmchhun

Kristian sakhua humhimna turin Congress party chauh hi tuna kawng awmchhun chu a ni tih Congress president Lalsawta chuan a sawi.
Mizoram Pradesh Mahila Congress Committee (MPMCC) buatsaiha Thawhlehnia Aizawl City Block Mahila Zaipawl intihsiak neih a hmanpuinaah MPCC president chuan Mizo hmeichhe tumruh leh a ngaihna hriate chu kan ram rohlu an ni, tiin, hmeichhe tha in ram leh hnam hmelhmang a thlak hlawk thei tih a sawi.
Kumin MLA inrthlanah ramin hma a sawn ngei ngeina tur kawng kan thlan a ngai a. Mihring nuna kan hnam himna tur leh thih hnu piahlam ram thlenga min thununtu kan sakhaw humhimna turin Congress party chauh chu tuna kawng awmchhun a ni tih a sawi. “Sakhaw zalenna rawn duh thar ve tu party dangte nen he thlarau indonaah hian hnehna chang turin hma kan la zel dawn a ni,” a ti.
MPMCC president Vanlalawmpuii Chawngthu pawhin ram leh hnamin a mamawh chu nu tha leh hmeichhe tha a ni a. Hmeichhiaten hnam hmelhmang nasa takin a tha zawngin an tidanglam thei tih a sawi. “Kan ram leh hnamin kawng dik a zawh theihna turin kan fate rilru pawh fimkhur takin kan thunun tur a ni. Kan ram dinhmun kan hria a, kan hnam leh sakhua a him lo hle. Hetiang laka kan ram, hnam leh sakhua humhim theihna turin Congress party bak tunah hmanrua kan nei lo tih hi kan fate pawh kan zirtir tur a ni,” a ti.