Mizo hnam leh kan sakhua himna turin Mizoram tan Congress party an sawrkar dawn tih Congress president Lalsawta chuan a sawi.
Zirtawpnia Congress Bhawan-a political session-ah MPCC president chuan Mizoram tana sawrkar tha siam turin an rinchhan chu Pathian a ni a, an zam lo tih sawiin, “Pathianin hna a thawh miau chuan tawngtaia dil phak pawha kan ngaih loh thlengin min chhang a. Sawrkar turin kan inbuatsaih a, kan sawrkar dawn a ni,” a ti.
Thusawi thiam leh haw haw inthlanna niloin, nunin thu a sawi zawk tur a ni, tiin, dik tak leh fel taka ram leh mipui enkawl thiam apiang an ding chhuak thin tih a sawi a. Kan hnam leh sakhua himna turin Mizoram tan Congress party a sawrkar dawn tih a sawi. An party MLA-te an party tan leh bial mipui tan nasa takin an thawk tih sawiin, “Heng tanrualna avang hian Congress party hi kan sawrkar dawn a ni,” a ti.
MPCC thupuangtu Dr Lallianchhunga chuan Congress party chu Mizoram mipui tana beiseina pe thintu a ni, tiin, “MNF-in Mizo nationalism hmangin India sawrkar an kap a, a nghawng leh sawhkhawk rapthlak zia chu tun thlengin a la reh lo. Kha hun thim taka Mizoram khaichhuak a, beiseina petu chu Congress party a ni. Tuna thlamuang tak, remna leh muanna neia hmalam kan pan theih chhan hi Congress party vang a ni a; 2008 atanga 2018 kha Mizoramin sawrkar a neih tawh zawng zawnga sawrkar tha bera ngaih a ni. Kha sawrkar aia tha zawk kha tunah Mizoram kan pe leh dawn,” a ti.
MNF-in Mizoram beiseina bo thak khawpin ram a hruai thin nia sawiin, Mizoram chanchina kuthnathawktuten sawrkar kawng an zawh khum hmasak ber an nih bakah thluaka sum lut leh mipui leiba tipung reng chunga nationalism sawiah Dr Lallianchhunga hian a puh. “Mizo nationalism sawi reng chunga damlo bill batsak te, sawrkar hnathawk hlawh batsaktute leh Hindutva kalpuitute nena inthlunzawm hi ram tan a him lo,” a ti. ZPM-ah mi tam tak an beidawng tan a, Congress party chuan Mizoram mipui beiseina thar a pe dawn tih a sawi bawk.
Kan sawrkar dawn – Congress president
