Aizawl khawpui chhunga police hotu lawk zualte chuan tunhnai khan ILP kenkawh mek dan an sawi ho a. Dan lova lo lut laka inven chu kan za vaia mawhphurhna a ni a, hnam dang in luahtirtu, sponsor-tu, a chhawrtu leh mimal tinin, dan kengkawhtute lo pui a, theihtawpa kan ram a him zel theih nana hma lak pui turin mi tin an ngen nghal a.
He meeting hi, Mizorama sipai lakna neih tura rawn tel tum, state pawn atanga tun hnaia lokal te, Vairengte ILP check gate-a boruak rawn siam deuh laihte avanga huaihawt a nih te pawh a rinawm a. ILP hi online atanga dil theih tura siam a ni tawh chungin, state pawn lam hian an la hre zau fahran lo a nih a rinawm a. Hetiang boruak hi nakin hnu zel pawha la thleng thei a nih avangin, a kaihhnawih thuneitute hian state danga an counterpart-te hnenah mipui hnena puangzar tura an sawipui te pawh a pawimawh awm e.
Kan hriat angin, Mizoram chhung inrelbawlna thil hrang hrangah, pawl hrang hrang YMA, MHIP etc. te leh sawrkar hnuaia department hrang hrangte thawhhona tha tak kan nei mek a, a thenah chuan ‘thuthlung’ te pawh siam a ni nghe nghe.
ILP chungchangah pawh hian zirlai pawl leh YMA chuan tha takin sawrkar an thawhpui mek a, hei hi thil lawmawm tak a ni.
Hetih lai hian, dan lova a ruka lo lutte hian veivah nan lirthei an bêl lo thei lova, lirthei khalhtute pawh hian hnamdang an phurh dawnin ILP an neih leh neih lohte zawt in, ILP nei lote chu phur duh lo thin ta se, hei hi lirthei khalhtuten an kalpui thei a nih phawt chuan, awmzia thui tak a neiin a rinawm.
A nihna takah chuan, mipui hi kan tanrual tak tak chuan, ILP nei lote hian khawsakna/chenna tur an nei thei dawn lo a, ILP valid nei lo tan Mizoram chhungah a awm reng theih dawn loh tihna a ni. Dan lova lo lut ru an tam viau chuan mipui kan tangrual tawk lo tihna pawh a ni nghal awm e. Hawh u, kan ram leh hnam venhimna hi, kan zavai hian mawh inphurhtir vek ang u.
Kan zavaia mawhphurhna…
