Kangvai velah Zo hnahthlak leh Meitei inkap

An zia deuh e tih a nih hnuah Kangvai khua leh a
chhehvelah silai a puak leh ul ul a, Zo hnahthlakte leh Meitei an inkap nasa leh.
Manipur atanga thu dawn danin, Inrinni liam ta atang khan Kangvai velah hian silai an puak a, nasa taka inkah chang pawh a awm. Ningani pawh khan an inkap viau.
Kangvai hi Vaiphei khua a ni a, Imphal atanga kala Churachandpur district intanna niin, Zo hnahthlak lamin buai tirh atanga ngawrh taka an ven a ni.
Inrinni vel atang khan an inkap a, Zo hnahthlak lam chuan Meitei-in an rawn pan a, an rawn beih hmasak vanga inkap an ni tih an sawi.
Kangvai hi Kawrbung khua nena inzawm titih a ni a, Zo hnahthlak khaw dang nena inhnaih te tea awm an ni. Chuvangin an inkap pawh hi a chhehvelah a kangkai sam a, ral atang chuan an inkahna ber pawh hriat fuh a har tih thu dawn a ni.
Hliam tuar zat leh nunna chan zat pawh hriat a har a, Ningni khan Zo hnahthlak pakhat chuan nunna a chan tih thu dawn a ni. Hliam tuar pawh pakhat a awm a, mahse a na vak lo nia hriat a ni. Meitei lamah nunna chan an awm thu Manipur media lamah a lang.
Ningani hian Meitei lamin bomb an hmang nasa a, a thawm a rin avangin an buai zual anga ngai an awm. Meitei hian gelatin bomb an tipuak nasa nia sawi a ni.
Manipur atanga thu dawn pakhatah chuan, Zo hnahthlak lam hi an intirh belh a, Ningani khan Meitei hi an um kir nual.
May leh June velah an inkah nasatna Sugnu leh a chhehvel thawm a reh rih a, Kangpokpi district pawh tun hnaiah an thawm a reh deuh a, mahse Nilaini vel khan intihbuai leh silai thawm hriat tur a awm leh tih thu dawn a ni.