Kanye West billionaire-ah a inchhal
Rapper Kanye West chuan billionaire a nih thu puangin, a hausakna chu dollar tluklehdingawn 2 chuang a nih thu social media lamah a puang a, mahse, a billionaire thu khawvela billionaire list siam thin Forbes leh Bloomberg te erawhin an pawmpui lem lo!
Kanye hian social media-ah graphic phochhuakin, chutah chuan Eton Ventures Services-in 2025-a Ye (Kanye West) hausakna chu dollar tluklehdingawn 2.77 a nih thu an tarlang a, a music portfolio bakah a Yeezy sumdawnna atanga an teh a nih thu an tarlang a, Ye, kum 47, chuan graphic post caption-ah, “LAA LA LA,” tiin a post tel bawk.
Forbes erawhin Kanye hausakna hi dollar maktaduai 400 angin an la tarlang a, Forbes list-a musician zinga billionaire te chu Jay-Z (dollar tluklehdingawn 2.5), leh Taylor Swift (dollar tluklehdingawn 1.1) te an ni a, Kanye nupui hlui Kim Kardashian hausakna chu dollar tluklehdingawn 1.7 angin an tarlang bawk.
Kanye sawi takah chuan Kim Kardashian nena an fanu North West, kum 11, chuan rimawi lamah a pa hnung zuiin talent a nei tih a rawn lantir ve ta a, FKA Twig hla thar, a album ‘Eusexua’ a hla ‘Childlike Things’-ah a rawn rap a, North West hian English mai bakah Japanese pawh a hnehsawh riau a, Japanese-in thui vak lo a rap.
North hian Isua chawimawina thu Japanese-in a rawn rap a, “Hello, ka hming chu North-chan a ni. California atanga Tokyo tlengin Isua chu Lal a ni. Lalpa chu chawimawi rawh u. Isua chauh hi Pathian tak chu a ni,” tiin a rawn chham.
North hi Japanese-a a rap vawi khatna a ni tawh lo va, nikuma Kanye album ‘Vultures’-a hla pakhat ‘Bomb’-ah khan North hian a hming chu ‘North-chan’ a nih thu leh ‘chibai ule’ tih te Japanese-in a lo rap tawh bawk.
Kanye West billionaire-ah a inchhal
