Kanye West leh Ty Dolla $ign ‘Vultures 1’ a No.1

Kanye West leh Ty Dolla $ign ‘Vultures 1’ a No.1
Kanye West leh Ty Dolla $ign te album intawm ‘Vultures 1’ chu Billboard 200 (albums) chart No.1-ah a debut a, Ye tan he chart-a No.1 kai thei album 11 a neihna a ni ta a, Ty tan erawh a pakhatna a ni ve thung. Hetihrual hian Usher album thar ‘Coming Home’ chu No.2-ah a debut a, he chart-a tun kum 10 chhunga a tawn san ber a la ni.
Billboard 200 chart hi kar khat chhunga US-a album hralh tam dan atanga tehin chart ranking siam thin a ni a, album hralh zat chhut nan hian album tak tak hralhna bakah streaming atanga album hralhna tlukpui leh album-a hla mal hralhna atanga album tlukpui te belhkhawm thin a ni.
Ye leh Ty album ‘Vultures 1’ hi kar khat chungin US-ah 1,48,000 hralhin No.1-ah a debut a, chung zinga 18,000 chu album tak tak hralhna niin, 1,29,000 chu streaming atanga album tlukpui (on-demand official stream maktaduai 167.78) a ni a, album-a hla mal hralhna atangin 1,000 a tling thei bawk.
Vultures 1 hi streaming services leh digital download album chiaha tihchhuah a la ni a, a hla 16 chu streaming site hrang hrangah dah niin, digital retailer-ah an hralh chhuak a, Ye-a official webstore-ah a lei theih bawk. A physical album (CD) leh vinyl te chu an la tlangzarh leh dawn a ni.
He album-ah hian Travis Scott, Playboi Carti leh Chris Brown te pawhin an aw an thawhnain, a tracklist-ah an hming tarlan a ni lo a, Ye-a fanu, kum 10 mi, North pawhin ‘Talking’ tih hlaah a aw a thawh ve nghe nghe a ni.
He album hi nikum October-a tlangzarh an tum tawh kha niin, a hun tur hi an sawn deuh sek a, Ye-a label YZY kaltlanga tlangzarh a ni. Ye hian Juda te huatna lam hawi tawngkam a neih avangin harsatna a tawk nual a, Adidas leh Def Jam Recording ten an thlauh thlak phah a, he thil thlen hnua a album tlangzarh leh hmasak ber a ni. Def Jam hi Ye album hmasa zawng zawng tlangzarh tu an ni.
He album hian harsatna a tawk nual mai a, album-a hla pakhat ‘Good (Don’t Die)’ tih chu 1977-a Donna Summer single ‘I Fell Love’ tih nena inang deuh ni a ngaiin, Summer estate hian phalna nei loin an hmang tia an puh avangin February ni 14 khan a album streaming edition chu Spotify atangin an paih a, ‘Good’ hla a album atanga an paih hnuah digital retauler thenkhat iTunes Store leh Amazon ang chi-ah te a album hi lei theih a ni ta lo bawk. Mahse, Ye-a official webstore-ah chuan ‘Good’ hla tel hian an la hralh chhuak reng tho a ni.
Ye hian chart No.1 kai thei album ngah lamah Bruce Springsteen leh Barbra Streisand a nih rual ta a, No.1 album 19 nei thei The Beatles leh Jay-Z (14), Drake (13) leh Taylor Swift (13) te chiah a pha lo. Ty tan chuan ‘Vultures 1’ hi he chart-a No.1 kai thei album a neih vawi khatna niin, top 10-a lang thei album pahnih a neihna a ni bawk.
Super Bowl Halftime show-ah Usher a che tha hle a, a album thar ‘Coming Home’ pawh hralh a kal viau a, 91,000 hralhin No.2-ah a debut a, chung zingah 53,000 chu album tak tak hralhna niin, streaming atangin 34,500 (om-demand official stream maktaduai 45.82) niin, album-a hla mal hralhna atangin 3,500 a tling thei bawk.
‘Coming Home’ hi Usher album he chart top 10-a lang thei pakuana a ni a, 2012 June thlaa a album ‘Looking 4 Myself’ No.1-ah a debut hnua he chart-a a tawn san leh ber a la ni. Hemi hnuah hian ‘Hard II Love’ (No.5, 2016) leh ‘A’ (No.31, 2018) album te a tichhuak leh tawh bawk.
Noah Kahan ‘Stick Season’ chu 85,000 hralh lehin No.5 atangin No.3 a kai thar a, he album hi deluxe edition an tlangzarh thar a, chu chuan hralh a tikal thar leh ta a ni.
Tihian chart top 10-a lang dang zawng chu chart No.1 hlui vek niin, Morgan Wallen ‘One Thing at a Time’ chu 64,000 hralh lehin No.2 atangin No.4-ah a tawlh a, SZA ‘SOS’ chu 51,000 hralh lehin No.3 atangin No.5-ah a tawlh a, Taylor Swift ‘1989 (Taylor’s Version)’ chu 50,000 hralh lehin No.8 atangin No.6 a kai thar leh a, Swift ‘Lover’ chu 48,000 hralh lehin No.9 atangin No.7 a kai thar leh a, Swift ‘Midnights’ chu 46,000 hralh lehin No.5 atangin No.8-ah a tawlh a, Toby Keith ‘35 Biggest Hits’ chu 46,000 hralh lehin No.1 atangin No.9-ah a tawlh a, Drake ‘For All the Dogs’ chu 45,000 hralh lehin No.6 atangin No.10-ah a tawlh ve thung.