Kar khat chhungin CAA hmang tan ang ti

Union Minister Shantanu Thakur chuan January 29 khan Citizenship (Amendment) Act (CAA chu ram pumah tunkar chhungin hman tan a ni ang a ti.
News channel tena an interview-naah Thakur, Bongaon atanga BJP MP chuan sawihlawh CCA dan chu nisarih chhungin tha taka lekkawh nghal a ni ang tiin a sawi.
CAA hi BJP kaihhruai sorkar in kum 2019-a a siam kha niin non-Muslim migrants ho an rama tihduhdah tawk Hindu, Sikh, Jain, Buddhists Parsi leh Christian te Bangladesh, Pakistan leh Afghanistan atanga December 31, 2014 hmaa India ram lutte khua leh tui nihna pekna tur a ni.
“CAA hman tan vat a ni dawn a, nisarih chhungin hman tan a ni ang, chu chu ka tiam a che u” tiin Thakur, Matua community leader chuan a sawi a. Thakur hi Union Minister of State for Ports, Shipping and Waterways a ni.
Tun hi CAA hman tur a tum khat sawina a ni lova a hma pawhin CAA chu ram pumah Lok Sabha inthlan hmain hman tan a ni ang a lo ti tawh.
Matua-te hi West Bengal a Scheduled Caste tam ber an ni a, kum 1950 chho atang khan West Bengal-ah an chenna khatihlaia East Pakistan leh tuna Bangladesh ni taah sakhuana thil avanga tihduhdan tuar nasa an ni.
Kum 1990 chho atang khan West Bengal-a poitical party-te chuan Matua-te thlawp nih tumin an bei nasa thin a, a chhan chu an tam a, inthuruala vote an thlak bawk thin vang a ni. CAA kalpui a nih chuan hlawkpui ber tura ngaih chu Matua community te an ni bawk.
Thakur thusawi hi West Bengal-a rorel lai Trinamool Congress (TMC) te chuan an helh hle a, TMC-te hi CAA dodal burtu niin ‘inthendarhna’ tia sawitute an ni.
“Kan party supremo leh Chief Minister Mamata Banerjee-in chiang takin West Bengal ah CAA hman a ni lovang a ti a ni. BJP leader-te hian Lok Sabha inthlan hma a politics boruak siam nan tihtheih loh tur an tiam a ni” tiin TMC thupuangtu Kunal Ghosh chuan a sawi.
Thla kalta khan Union Home Minister Amit Shah chuan CAA hman chu ‘law of the land’ a nih avangin tihmakmawh tiin a lo sawi tawh bawk a ni.
Kolkataa BJP meeting neihnaah Shah chuan Banerjee chu CAA issue chu mipuite fah dik lovah a puh bawk a. TMC-te chuan CAA chu dodal bur thungin Banerjee chuan BJP te chuan citizenship issue chu politics a hamthat nana hmangah a puh bawk.