International break a nih hnuin kar tawp khan European top 5 league khelh chhunzawm a ni a. Europe a league lian zual pangaa thil thleng langsar bakah player ropui pahnih; Linoel Messi leh Cristiano Ronaldo te hnu hma kan tarlang leh ang.
English Premier League
Inrinni zan khan EPL club lian pahnih Manchester City leh Liverpool te chu Etihad Stadium-ah an inkhel a, 1-1 in an inhnehtawk. Liverpool lakah City goal hi Erling Haaland thun a ni a, Haaland hian EPL-ah goal 50 thun tling chiahin, EPL-ah goal 50 thun tling rang ber a ni. Haaland hian EPL a goal 50 thun nan game 48 chiah a mamawh a, game 65 atanga goal 50 thun a record lo siam tawh Andy Cole record a khum. Haaland hian Cole aiin goal 50 thun nan game 17 zetin a hmang tlem zawk.
Liverpool lakah an chak zawh loh vangin an muala inelna hrang hrangah Ciry in vawi 23 zet an chak zawn tawh chu tihtawp a ni. EPL club zingah an muala chak zawn rei ber Sunderland record nih rual an tumna an hlawhtling zo lo.
Pathianni zanah Manchester United in si hnih faia Everton an hneh tumin Alejandro Garnacho chuan goal ropui a thun a, United striker ten game 9 chhung zet goal an thun tawh loh chu tihtawp a ni a. United striker te hi EPL-ah goal thun thei lo zawn rei ber pahnihna an ni hman hial. Everton laka goal ropui thuntu Garnacho kha kum 19 leh ni 148 a upa a ni a, Everton mualah Goodison Park-ah United tana goal thun thei naupang ber a ni nghal.
Spanish La Liga
Pathianni zanah si thum faia Cádiz an hneh tumin Real Madrid tan Jude Bellingham chuan goal a thun a, he goal hi season kal meka a goal 14-na niin Real Madrid record thar a siam. Bellingham hian Real Madrid tan La Liga khelh hmasak 15-ah goal 14 a thun a. Real Madrid tan khelh hmasak 15-a goal 13 thun a, goal thun tam record lo siam tawh Cristiano Ronaldo leh Alfredo Di Stefano te recotf chu Bellingham hian a khum.
Rayo Vallecano chuan Barcelona lakah hnuhma tha an hnutchhiah belh a, an inkhelh hnuhnung vawingaah tlawm an pumpelh vek. Barca laka tlawm an pumpelh leh ta hian Barcelona laka an tlawm loh zawn rei ber record lo awm a nih rual.
Inrinni zanah si khat faia Mallorca an hneh tumin Atletico Madrid tan Koke a inlan a, Koke hi Atletico Madrid tan vawi 600 khel tling thei hmasa ber a ni.
Mallorca laka Atletico Madrid chakna goal hi Antoine Griezmann thun a ni a, Griezmann hian Atletico Madrid tan goal 170 a thun tling chiah a, an club tana goal thun hnem pahnihna niin a chungah hian goal 173 thun tawh Luis Aragones a awm mek.
Real Madrid tan Rodrygo a chetha chhunzawm zel a, La Liga game hnuhnung pahnihah goal hnih a thun zawn bakah assist a nei ve ve bawk a, Lionel Messi hnuah La Liga-a hetiang ti leh thei hmasa ber a ni.
Sevilla in Real Sociedad an hmachhawn tumin Sergio Ramos hnawhchhuah a ni. Defender rorum Ramos hi La Liga-ah vawi 21 hnawhchhuah a ni tawh a, La Liga-ah hnawhchhuah ngun ber a ni.
Italian Serie A
Kum kal mekah Inter Milan tan Lautaro Martinez a khel tha chhunzawm zel a, Martinez hian league-ah goal 27 a thun tling tawh. Kum 2000 hnu lamah kum khat chhungin Inter tana goal thun hnem pathumna a ni mek a, a chungah hian kum 2001 goal 28 thun Christian Vieri leh kum 2012-a goal 28 thun Diego Milito te an awm mek.
Salernitana lakah 2-1 an tlawm tumin inrinni zan khan Lazio tan Ciro Immobile chuan goal khat a thun. Immobile hian Serie A-ah bik Mimualah goal 100 a thun tling chiah a, first Serie A player zingah away a goal 100 thun thei hmasa ber a ni.
Inrinni zanah AC Milan in si khat faia Fiorentina an hneh tumin AC Milan rawlthar kum 15 leh 260 a upa Francesco Camarda chu hun tawp dawn hnaiah mual chhung a lut a, Camarda hi Serie A khel thei naupang ber a ni nghal a. Kum 15 leh ni 274 mi ni chunga Serie A hmachhawna Serie A player naupang ber lo ni tawh Wisdom Amey record a khum.
German Bundesliga
Inrinni zanah si khat faia FC Cologne an hneh tumin Harry Kane chuan chakna goal a thun. Kane hian Bundesliga a khelh hmasak vawi 12 atangin goal 18 a thun tling der tawh a, Bundesliga-ah khelh hmasak 12 atanga goal 18 thun tling thei hmasa ber niin record thar a siam.
Pathianni zan khan Werder Bremen lakah Xabi Alonso chuan Bayer Leverkusen a chakpui leh ta a. Alonso hi Leverkusen manager zingah Bundesliga-a vawiriat chak zawn thei hmasa ber a ni.
Messi-Ronaldo
Club ta la khel leh rih lo Lionel Messi chu kar hmasa khan Argentina tan a inlan a, CONMEBOL atanga World Cup khel tur zawnnaah an elpui lian Brazil chi si khat faiin an hneh. Messi hian Brazil lakah goal a thun thei lo leh a, World Cup khel tur zawnnaa team an hmachhawn hrang hrangah lakah goal thun thei bawk mah se Brazil lakah erawh Messi hian goal a thun thei lo tluang zel thung.
Cristiano Ronaldo chuan Al-Nassr tan goal a thun leh ta a, Saudi Pro-League-ah goal 15 thunin, topscorer a nihna a tizau a, amah hnaih bertu Aleksandar Mitrovic aiin goal liin a thun tam zawk mek. Ronaldo hi Asian Champions League lamah a che mawi chhunzawm. Persepolis nen goal awm lova an inhnehtawk tumin Ronaldo hian penalty a hlawhchhuak hman a. Referee hnenah penalty a pekna chu pekna tlak a nih loh thu hrilhin, a thutlukna sut turin a ngen a. Chinese referee Ma Ning pawhin Ronaldo ngenna pawmin a thutlukna a sut a, Al-Nassr in penalty an hmuh loh phah. Persepolis lakah chak zo lo mah se Al-Nassr hian knockout round an lut chiang tawh tho thung.