International break a nih hnuin kar tawp khan tualchhung league khelh chhunzawm a ni a, hliam vanga chawl reng Lionel Messi pawh a inlan ve leh thei ta. Kar tawp football a hnuhma langsar zual kan hrut kual leh thuak thuak ang.
Englsih Premier League
Pathianni zan khan North London derby khelh a ni a, Tottenham muala lenglut Arsenal in Gabriel Magalhae goal thun hmangin hnehna an chang. Arsenal hian London hmar veng derby-ah vawi thum hnehna an chang zawn a, September 1988 hnu lamah North London derby-a vawi thum an chak zawn vawi khatna a ni.
Arsenal hi Mimuala an khelhah vawi ruk an chak zawn tawh a, hei hi March-September 2013 hnu lamah Mimuala an chak zawn rei ber tum a ni a. Mimuala an chak zawn rei ber tum chu Arsène Wenger enkawlna hnuaiah vawi riat an chak zawn kha a ni. Tottenham chakpuitu Gabriel khan EPL-ah chakna goal vawi riat a thuna a ni bawk.
Totten leh Arsenal te inkhelah khan chawlhlawk hmain mi pasarihin yellow card an hmu hman a. Kum 2008 hnu lamah EPL match ah chawlhlawk hmaa yellow card hmu tam leh ber tum a ni.
Inrinni zan khan champion lai Manchester City chuan 2-1 in an mikhual Brentford an hneh. Brentford laka City goal hnih hi Ertling Braut Haaland thun a ni. Haaland hian an muala EPL a hmachhawn tawh vawi 36 atangin goal contribution vawi 50 a nei. Haaland hian goal 41 a thun bakah assist vawi 9 a nei bawk a, game tinah goal 1.14 thun zel ang a ni. Goal thun thei bik Haaland hi EPL chanchinah season tharh game li atanga goal 9 thu tling thei hmasa ber niin record thar a siam a. 2019 hnu lamah EPL game thumah a zawna goal hnih chin thun zawn leh thei hmasa ber a ni bawk.
Crystal Palace forward Jean-Philippe Mateta chuan kum 2024 chhungin EPL-ah bik goal 16 zet a thun tawh a, kum 2024 ah bik EPL a goal thun hnem ber dawtttu niin, a chunga awm hi Haaland a ni.
Inrinni zan khan Manchester United chuan 3-0 in Southampton an hneh. Saints lakah 3-0 a an chak hi February thla hnu lamah EPL-ah 3-0 a an chak leh vawi khatna a ni.
Spanish La Liga
Champion lai Real Madrid chu tlawm nei lovin an kaltluang zel a, inelna hrang hrangah khelh 32 chhung tlawm nei lovin an kaltluang ta chiah. Hei hi Real Madrid chanchinah tlawm nei lova an kal tluan rei ber dawttu a ni a. Tlawm nei lova an kal tluan rei ber chu April 2016 – January 2017 chhunga khelh 40 zet tlawm an nei lo kha a ni.
Real Madrid hian Irinni zan khan penalty vawi hnih an chakpui a, penalty pakhat zawk hi Vinicius Junior pet goal a ni. Brazil forward Vinicius Junior hian Real Madrid tan penalty vawi nga a pet tawh a, a la pet goal vek.
A club thar Real Madrid tan La Liga-ah bik bul tan tha lo mah se Kylian Mbappe chu Real Madrid tan a khel tha chho ta viau a, Mbappe hian Los Blancos tan inelna hrang hrangah vawi thum khelin goal li a thun der tawh.
Kum 17 leh ni 64 a upa Lamine Yamal chuan Pathianni zana an khingpui Girona lakah chawlhlawk hmain goal hnih a thun a. Yamal hi La Liga-ah chawlhlawk hmaa goal hnih thun thei naupang ber a ni. Barcelona hi season tharah an khel tha viau a, an game hnuhnung pahnihah goal 11 zet an thun a, hei hi 2017 hnu lamah Barcelona in an tih leh theih vawi khatna a ni.
Inrinni zan khan Sevilla in 1-0 in Getafe an hneh. He inkhela goal awm chhun hi kum 38 mi Jesus Navas thun a ni. Navas hi Sevilla tana goal thun thei upa ber a ni a, Sergio Ramos record a khum.
German Bundesliga
Inrinni zan khan team lian Bayern Munich chuan mikhual an nihna hmunah 6-1 ngawtin Holstein Kiel an hneh. He inkhelah hian Bayern Munich forward Harry Kane chuan hattrick a siam. Kane hian Bundeliga-ah hattrick vawi riat a siam tawh a, Bundesliga-a hattrick siam hnem ber Andrej Kramaric record a nih rual.
Messi & Ronaldo
Hliam vanga a chawlh deuh vang vang hnuin Lionel Messi chu a inkhel ve leh thei ta. Messi hian Inter Miami in Philadelphia Union an hmachhawn tumin goal hnih a thun. Hei hi July ni 10-ah Canada laka goal a thun hnua goal a thun leh hmasak ber a ni nghe nghe. Messi hian MLS season kal mekah khelh 13 atangin goal 14 a thun a, assist vawi 13 ngawt a nei tawh bawk.
Lionel Messi goal hnih hmuh tur a awm lai hian Cristiano Ronaldo chu kar tawp khan a awl rih thung.
Kar tawp Football hnuhma
